Shillong, Jylliew 17
U lahduh jong ka French Open u Carlos Alcaraz u la khmih lynti ban ïoh bun tylli ki nam jop ha ki jingïalehkai jong ki madan phlang (grass-court) hadien ba u la khur ïa ka jingjop kaba nyngkong eh ha madan dewbyrtha ha Roland Garros.
Une u rangïalehkai ba dang 21 snem ka rta u la long uba dangkhynnah ban khur jingjop ha ki lympung ïalehkai kiba heh kata ha baroh lai tylli ki jingïalehkai (grass, hard courts bad clay) hadien ba u la lah ban pynliem noh ïa u Alexander Zverev ha Paris ha ka sngi U Blei ba la lah.
Hynrei mynta ka jingpynleit jingmut jong u Alcaraz ka long na ka bynta ban khur bun tylli ki nam jop ha ki jingïalehkai jong ki madan phlang, bad une u rangïalehkai na Spain u la khmih lynti ban bteng biang ïa ka jingjop kaba ar ha London hadien ba u la khur ia ka jingjop kaba nyngkong ha u snem ba la lah ha ka Wimbledon.
Ka long ka taïew ka ban pynsah kynmaw na ka bynta u Alcaraz, bad ka jingjop ha ka French Open ka la pynlong ïa une u rangïalehkai ban ialeh-kai lang bad u khlur ïalehkai uba la bat ïa ka nam jop haduh 14 sien ha Roland Garros u Rafael Nadal ha ka Olympics ka ban long ha u bnai ban wan ha Paris.
“Nga la ïoh ban shong shuti shipor, nga la leit sha Ibiza lem bad ki paralok ban ïalehkmen,” la pynpaw u Alcaraz.
“Hooid ka Roland Garros ka la long kaba phylla eh ïa nga ha kine ki ar taïew,ha kaba ki la urlong ha ka jingïaid lynti ka jong nga, hynrei mynta ka thong ka jong nga ka long ban khur jingjop ha ki jingïalehkai jong ki madan phlang.”
