Nongstoiñ, Jylliew 18
Ka kynhun ïalehkai jong ka Dapboklang Giri Memorial SS bad ka Sib Singh Memorial Govt. HSS ki long napdeng ar tylli ki skul kiba la ïoh ban rung sha ka semi final jong ar tylli ki kyrdan ïalehkai ha ka West Khasi Hills District level Inter School Subroto Mukherjee Cup Football Tournament 2024 ba la pynlong da ka shlem treikam ka District Sports Officer.
Kane ka long ka sien kaba nyngkong eh ïa kitei ar tylli ki skul hadien ba ïoh jingjop ha ka jingïalehkai quarter final.
Ha ka jingïakhun quarter final jong Under-15 (Boys) kaba la long ha ka Sngi Ba-ar ha madan New Nongstoiñ, ka Dapboklang Giri Memorial ka la pynliem noh da 4-3 kol ïa ka Joel Gatphoh Higher SS lyngba ka jingïashut tie-breaker hadien ka jingïakhaid ha ka jingïalehkai. Ka St.Anthony’s Higher SS pat ka la pynliem noh da 2-1 kol ïa ka Sib Singh Memorial Govt. HSS.
Nangta, ha ka Under-17 (boys), ka Joel Gatphoh HSS ka la pynliem noh da 2-1 kol ïa ka St. John Bosco SS, katba ka Sib Singh Memorial Govt. HSS ka la pynliem noh da 3-0 kol ïa ka Presbyterian HSS.
Haba phai pat ha ka jingïalehkai quarter final jong ka Under-17 (girls) ha madan NDSA kaba ha Nongpyndeng, ka Kyrshai UP& LP School ka la pynliem noh da 3-2 kol ïa ka St. Xavier SS lyngba ka tie-breaker.
Shuh shuh ka Don Bosco Mawkhlam ka la pynliem noh da 2-0 kol ïa ka BBC SS, nangta ka Sib Singh Memorial Govt. HSS ka la pynliem noh da 3-1 kol ïa ka Joel Gatphoh HSS lyngba ka tie-breaker hadien ka jingïakhaid da mar shi kol, katba ka Dapboklang Giri Memo-rial SS ka la pynliem noh da 2-0 kol ïa ka Presbyterian HSS.
Na ka liang ka shlem treikam jong ka DSO ka la pyntip ruh ba ka jingïalehkai quarter final kaba khatduh jong Under-17 ki shynrang kan bteng biang ha ka Sngi Balang ha madan New Nongstoiñ ha ka por 10 baje mynstep hapdeng ka Don Bosco SS pyrshah ïa ka St. Xavier’s SS, katba ha ka por 12 baje mynsngi ka Dapboklang Giri Memorial SS ïa ka Rev.JJM Nichols Roy SS.
Shuh shuh, la pyntip ruh ba ki kynhun kiba la ïoh ban rung sha ka semi final ha ka Under-17 jong kynthei ki kynthup ïa ka Kyrshai LP&UP School, Donbosco Mawkhlam, Sib Singh Memorial Govt. HSS bad ka Dapboklang Giri Memorial SS.
Nangta, ha ka Under-15 ki shynrang ki kynhun kiba la ïoh ban rung sha ka semi final ki kynthup ïa ka Borsing Memorial SS, Dapboklang Giri Memorial SS, Lumangkara SS bad ka St. Anthony’s HSS.
Shuh shuh ha ka Under-17 ki shynrang pat ki katto katne ki kynhun kiba la ïoh rung sha ka semi final ki kynthup ïa ka Joel Gatphoh HSS bad ka Sib Singh Memorial Govt. HSS.
