Guwahati, Jylliew:
Ki pulit ki la ïoh ban kurup ïa bun u drok ba shong dor T. 48 klur ha ki ar tylli ki jingpyntreikam kiba la long ha Sivasagar bad Karbi Anglong distrik kiba don ha Assam.
Ha kane ka jingjia ki pulit ki la ïoh ruh ban kem ïa lai ngut ki briew ha kine ar tylli ki jingpyntreikam. Ha ka jingpyntreikam kaba nyngkong kaba la long ha Sivasagar distrik, ki pulit ki la ïoh ban bat ïa ka trok Tata 407 ha ka miet jong ka 16-17 tarik, Jylliew, kaba la wan na ki bynta jong ka Nagaland.
“Ha ka por ba la pynlong ïa ka jingkhmih bniah, ka kynhun pulit ka la ïoh ban kurup ïa kumba 399 tylli ki synduk sabon kiba don ïa u Heroin uba don ïa ka jingkhia kaba 4.6 kilo na kane ka kali bad ïohkem ïa arngut ki briew,” la ong u heh pulit.
Sa ha kawei pat ka jingpyntreikam, ki pulit jong ka Karbi Anglong distrik ki la ïoh ban kurup ïa 8.033 kilo u Morphine bad kem ïa uwei u briew.
U Myntri Rangbah jong ka Assam u Dr. Himanta Biswa Sarma ha ka jingpyllait khubor jong u lyngba ka rynsan X u la ong, “Ha ka jingpyntreikam pyrkhing pyrshah ïa ka kynhun khaïi drok, la ïoh ban kurup ïa u drok uba la kot sha ka T. 48 klur. Ha ki ar tylli ki jingpyntreikam kum shi bynta ban ïakhun pyrshah halor ka jingkhaïi ïa ki jingdih pynbuaid, ki pulit ka Assam ki la ïoh ban kurup ïa uba bun ki drok na ka jylla ba marjan bad lah ban ïada ïa kiba bun ki mynsiem briew ba kin lait na ki jingshah ktah ha u drok. Ki pulit jong ka Sivasagar ki la ïoh ban kurup ïa u drok Heroin uba 4.6 kilo uba la kot sha ka T. 40 klur bad kem ïa arngut ki briew. Ki pulit jong ka Karbi Anglong ruh ha ka jingpyntreikam ki la ïoh ban kurup ïa u drok Morphine ba 8.033kilo uba la kot sha ka T. 8 klur bad ïoh ban kem ïa uwei uba la shah kynnoh donkti ha ka kam khaïi drok. Ka la long ka kam bah jong ka kynhun ha Assam.”
