Burgenstock, Jylliew:
Ki heh ka pyrthei ha ka Sngi U Blei ki la mynjur ban kyrshan bad iashah liang sha ka Ukraine hapdeng ka jing-iakhun thma jong ka pyrshah ia ka Russia. Hynrei la ong ba kitei ki nongialam kim shym pat buh thong ne jingthmu halor kumno ba kin ai jingkyrshan ia ka Ukraine khnang ba kan ym khyllem hapdeng ka jingiakhun thma pyrshah ia ka Russia.
Namar mynta la ar snem tam ba ka Russia ka la leit hiar thma ia ka Ukraine, la ong ba kitei ki heh na ki 90 tylli ki nongbah bapher bapher ki la leit ban iakynduh lang sha ki thaiñ ri lum jong ka Switzerland na ka bynta ka jingialang ba kyrpang kaba la pynlong haduh ar sngi kynthih na ka bynta ban leh eiei noh haba iadei bad ka jingma kaba ap ia ka pyrthei bad kaba la wan jia ha Ukraine bad Israel mynta hadien jong ka Thma-bah kaba Ar (World War II).
Kumjuh ruh na ka liang u President ka Ukraine, u Volodymyr Zelensky u la ïaroh ia katei ka jingiatrei lang jong ki heh bapher bapher ka pyrthei ban wanrah ia ka bha ka miat bad ka jingbishar kaba dei hok khamtam ia ki ri kiba dang tlot bad rit kum ka Ukraine.
Namar u Zelensky u la ong ba ka Russia bad ki nongialam ka Russia kim shym don jingthmu ban wanrah ia ka jingiasuk ne ban sangeh noh ia ka thma.
Kumjuh ruh u la ong ba ka jingiakren ïasuk hapdeng ka Russia bad Ukraine ruh ka lah ban urlong tang lada ka Russia ka mynjur ban ieh noh bad aiti biang ia kito ki bynta kiba ka la kam trai ki jong ka Ukraine bad kiba ka dang thmu ban kurup ha kane ka por.
Katba, na ka liang jong ka Russia pat ruh la ong ba ka la dawa ia ka Ukraine ba kan pyndem noh lada ka kwah jingsuk bad lada ka kwah ban pynkut ne pynsangeh noh shi syndon ia ka thma.
