Seoul, Jylliew:
Da ki phew ngut ki shipai ka North Korea kiba pyrshang ban jam sha shiliang khappud ki la mynsaw jur hadien ba ki bom ‘Landmine’ ba la pynap ha kitei ki bynta khappud ka North Korea bad South Korea ki la bthei ha ka Sngi Ba-ar.
La ong ba kane ka dei ka sien ka ba ar ia ki shipai ka North Korea ba kin ngat ha kum kane apot tang hapoh jong kine ar taiew. Katba na liang ki heh ka tnat iada jong ka South Korea ki ong ba katei ka jingjia ha ka Sngi Ba-ar ka long hi thik kumjuh kumba la jia ha ka 9 tarik u Jylliew, ha kaba ki shipai ka North Korea ki thmu ban rung jubor sha shiliang khappud jong ka South Korea khlem da poi pyrkhat ba kin ngat ha kitei ki bom ba la pyn-ap bad pynkhreh lypa da ki bor pahara khappud jong ka North Korea hi.
Namar la ong ba ka jingiadei hapdeng kitei ki ar ri- ka North Korea bad ka South Korea, ka la hiar haduh katta naduh ka thma kaba la khie ha ki snem 195- 1953 ha kaba kitei ki arliang ri kim shym la lah ban pynkut ia katei ka thma da ka jing-iasuk hynrei ka la shu kut noh kumto da kiwei pat ki daw bad kiwei pat ki rukom kiba ym pat lah ban wanrah ia ka jingiabeit hapdeng kitei ki ar ri haduh kane ka kynti ba mynta.
Kumta, la ong ba ha katei ka Sngi Ba-ar kitei ki shipai ka North Korea ki la mynsaw ha ka jingbthei ki bom ba la pyn-ap ha khappud katba ki dang thmu ban leit kam jubor na shiliang sha shiliang khappud ha katei ka sngi.
Kumjuh ruh na ka liang ki bor pyniaid ka South Korea ki la pyntikna halor katei ka jingjia bad iathuh ba katto katne ngut ki shipai ka North Korea ki la ngat ha kitei ki bom katba ki dang thmu ban kam sha shiliang khappud wat hadien ba ki la iohi bad ïohsngew ia ki jingsiat ban maham ia ka jingleh pyrshah jongki.
Namar la ong ruh ba ka North Korea ka ju phah ia ki bor pahara jongka ba kin leit pyn-ap bom bad tep ia ki bom ha kylleng ki bynta khappud jongka, hynrei bunsien hi dei ki shipai jongka hi kiba ju ngat bad mynsaw ne khlad na ka jingbthei jong kitei ki bom ba ki la dep ban leit buh bad pyn-ap hi dalade.
