Shillong, Jylliew 18
Ka France ka la jop ha ka jingïalehkai ba nyngkong jong ka lympung Euro 2024 hadien ba ka lah ban pynliem noh ïa ka Austria da 1-0 kol ha ka Sngi Ba-ar. Katba ha kawei ka liang pat u khlur ïalehkai kane ka kynhun u Kylian Mbappe u la ngat ha ka jingmynsaw.
Kane ka nam jop ka la wan lyngba ka kol ba la kum thep hi da u rangïalehkai ka Austria u Maximilian Woeber ha ka minit kaba 38 na ka bynta ban pynlong ïa ka France ban ïoh 3 point ha ka Group-C.
Ka Austria hapoh ka jingïalam u Ralf Rangnick, ka la lah ban ïalehkai bha ha kane ka jingïakhun namar ka la lah shisha ban khanglad ïa ki jingpyrshang bad kabu ba ïoh da ka France.
U Mbappe u la duh ei ïa ka kabu ksiar ban thep kol na ka bynta ka France ha shwa ba un ngat ha ka jingmynsaw. Ha kane ka jingïakhun u Mbappe u la ïatyngkhuh bad u rangïalehkai shadien ka Austria u Kevin Danso ha ka por ba ki dang ïaknieh bol. Kane ka jingmynsaw ka la pynlong ba un hap ban mih noh madan ïalehkai.
Na ka liang u coach ka French u Didier Deschamps u la pynthikna ba u la mynsaw jur da kaba ong ba u Mbappe u la mynsaw na ki bynta jong u khmut. Kane ka jingmynsaw ka jong u kam shym la long kaba shai, ha kaba kham ha shwa la ong ba um da donkam ban ïoh ka jingshah sumar kaba paka.
“Ha ka por ka bym poi pyrkhat u la ngat ha katei ka jingmynsaw ha ki bynta jong u khmut bad kane ka pynkhuslai bha ïa ngi kum ka kynhun hi baroh kawei,” la ong u Deschamps.
Kane ka jingmynsaw ka la pynkhuslai ïa u Mbappe la u lah ne em ban ïalehkai ha ka jingïakhun ka ba ar jong ka France pyrshah ïa ka Netherlands ka ban long ha ka Sngi Thohdieng.
