Shillong, Jylliew 18
Ka lympung ïalehkai District Level Inter School Subroto Mukherjee Cup Football Tournament 2024 ba la pynïaid da ka shlem treikam District Sports Officer (DSO) Ri Bhoi ka la jan poi artad sha kaba kut ha kaba ki kynhun ïalehkai jong baroh lai tylli ki kyrdan ïalehkai kin pynkhreh ban ïaknieh ïa ka nam lahduh ha ka Sngi Balang ha madan Nongjri, Ri Bhoi District.
Ki kynhun ki ban ïakhun final ha ka U-17 (girls) kin long hapdeng ka Christian HSS pyrshah ïa ka Saiden SS ha ka por 9:30 mynstep, kumjuh ha ka U-15 (boys) ka Nongjri Presbyterian SS kan ïakynduh pyrshah ïa ka Mynken Christian HSS ha ka por 11:30 mynstep. Ka Nongjri Presbyterian kan ïakynduh biang pyrshah ïa ka Mynken Christian ha ka U-17 (boys) ha ka por 1:30 mynsngi.
Ha ka jingïakhun semi final jong ka U-17 (girls) kaba la long ha ka sngi Ba-ar, ka Christian ka la pynhliem noh ïa ka RBP HSS da 2-1 kol bad ka Saiden ka la jop ïa ka Nongjri Presbyterian SS lyngba ka tie-breaker da 4-3 kol.
Ha ka semi final jong ka U-15 (boys), ka Nongjri ka la pynliem noh ïa ka St. Mary’s da 1-0 kol bad ka Myngken ka la jop da 2-1 kol ïa ka Nehru HSS.
Haba phai sha ka semi final jong ka U-17 (boys), ka Nongjri ka la pynliem noh ïa ka Saiden SS da 2-0 kol bad ka Mynken ka la jop ïa ka Nehru HSS lyngba ka tie-breaker da 4-1 kol.
