Shillong, Jylliew 18
U MLA barim ka Mawlai u Bah Process T. Sawkmie ha ka Sngi Ba-ar u la pynpaw ïa ka jingsngewkhia ba naduh bym long MLA shuh ma u, ki sports bad ki kam pynroi ki la kynjah lut hapoh Mawlai konstitwensi.
U Bah Sawkmie kum u kongsan u la khlei ïa kine ki kyntien ha ka jingplie ïa ka rynsan ïakop siat carrom ba la tip kum 17th Lawei ka ri Open Carrom Championship 2024 ba la pynïaid da ka Lawei Ka Ri Sports Social & Cultural Club ha Indoor Sports Hall, Mawlai Mawdatbaki.
U la pynpaw ba naduh bym long MLA shuh ma u bun ki klob ha Mawlai kim lah shuh ban pynlong ïa ki lympung ïalehkai jong ki, ym tang kata, ka roi ka par ruh ka la kynjah jlang.
Ha kawei ka liang u sngew-kmen pat ba ka Lawei ka ri ka dang bteng ïa kane ka lympung ha ka sien kaba khathynñiew tad haduh mynta naduh ba la seng ïa ka.
U pynpaw ruh ba mynshuwa ki don ki jingïakob ïalehkai chess, arm wrestling ne ïakhun kti, phutbol, marathon bad kiwei kiwei.
U la ïathuh ruh ba ha ka por jong u ki don ki jingïathong phutbol bad kiba ïoh rah ïa ka nam lahduh ki ïoh da u sniang bad kiba wan ba-ar da u syiar. “Hynrei mynta kine ki jingïalehkai kim don shuh, kaei kaba la pynlong ïa ka Mawlai ba kan long kumne,” la ong u MLA barim.
U pynpaw ba ha ka por mynshuwa la ïohi bha ïa ki kam pynroi ha Mawlai, la ki dei ki lynti syngkien, ki klob bad kiwei kiwei. U la ong ruh ha ka por jinglong MLA jong u, u la ïoh ban pynlong ïa ka Miss Mawlai, nangne la ïoh sei ïa ki ‘thei bhabriew ban mihkhmat ha ka Shillong bad Meghalaya.
Ha kane ka sngi la ïoh ruh ka jingkren na u Bah G. Lymba, President ka Lawei ka Ri, Bah A. Khyriem, Secretary, kiba la ai khublei ïa bah PT Sawkmie, uba la don ryngkat bad ki ha kane ka sngi, bad ki la pyrto ïa ki kam jong u, ubym ju ïehnoh ïa ki man ba ki leit ud leit nam ha u halor ki jingdonkam ka seng jong ki.
La ioh ruh ka jingkren na u Bah D. Khongwir, Chairman ka Indoor Stadium, Mawlai Mawdatbaki, ha ka jingdon ryngkat ruh ki dkot ka Lawei ka Ri, ki nongshim bynta ha ka ïakob carrom bad kiwei.
