Shillong, Jylliew 18
Ka Turkey ka la pynliem noh ïa ka Georgia da 3-1 kol na ka bynta ban ïoh jingjop banyngkong ha ka Euro 2024 ha ka Sngi Ba-ar ha Dortmund.
Kane ka la wan urlong lyngba u Mert Muldur, Arda Guler bad u Kerem Akturkoglu na ka bynta ban pynlong ïa katei ka kynhun ban khur ïa ki lai point kiba nyngkong ha ka Group-F.
Ha kane ka jingïakhun ka Turkey ka la ïoh ban pynkhih jar nyngkong eh lyngba u rangïalehkai shadien uba la kha ha Austria, u Mert Muldur ha ka minit kaba 25. Kane ka la wan hadien ba u rangïalehkai shadien ka Georgia uba dang pyrshang ban pyllait na ka jingshah thep, hynrei ka bol ka la poi sha u Muldur u bym shym la pynlehnohei ïa kane ka kabu ksiar.
Hadien shiteng kynta ka Georgia ka la lah ban pynphai kylla lyngba u Georges Mikautadze ha ka minit kaba 32 bad kane ka la wan lyngba ka jingïarap pynbuh bol u Giorgi Kochorashvili na ka bynta ban ïakhaid mar shi kol.
Hadien ba la bteng biang ïa ka jingïakhun jong ka kylla miet kine ki kynhun ki la pyrshang ban ïakhun tyngeh ha kaba ki la ïoh ïa ki katto katne ki kabu kiba biang, hynrei kim shym la lah ban thep. Ka Turkey ka la ïoh ban thep ïa ka kol ka ba ar lyngba u rangïalehkai shapdeng ka Real Madrid u Arda Guler, uba la ïoh ban shut da ka kjat kadiang bad ka la leit na kyndong jong u diengkol bad ka la rung jlang ha ka minit kaba 65. Kane ka jingïoh ban thep kol ka la wan urlong lyngba ka jingïarap pynbuh bol u Kaan Ayhan.
Wat la ka Turkey ka la ïoh ban shut ïa ka bol lyngba u Yusuf Yaz, hynrei u rangapkol ka Georgia u Giorgi Mamardashvili u la lah ban pyllait na ka jingshah thep ha ka minit kaba 87. Shwa ban wai ka Georgia ka la ïoh ïa ka kabu kaba biang, hynrei u Kochorashvili u la pynlehnohei ïa kane ka kabu ksiar.
Kumta hadien ba ki rangïalehkai ka Georgia ki la mih lut shakhmat na ka bynta ban ïoh pynphai kol ha ka corner kaba khatduh jong ka minit ïalehkai, hynrei ka la long pat ka kabu ksiar ïa ka Turkey na ka bynta ban ïoh thep ïa ka kol kaba lai lyngba u Kerem Akturkoglu (90+7) bad pynlong syndon ban ïoh jingjop.
Lyngba kane ka jingjop ka Turkey kan pynkhreh ïa ka jingïakhun ba ar pyrshah ïa ka Portugal ha ka 22 tarik, katba ka Georgia ïa ka Czech Republic.
