Gangtok, Jylliew:
Ki la don kumba 64 ngut ki nongjngohkai pyrthei kiba la shah pyllait im na Lachung kaba don ha North Sikkim ha ka lah sngi U Blei bad ïalam ïa ki sha Mangan, la ïathuh ki heh ba dei khmih.
Ka jingpyntreikam ha ka ban pyllait im ïa kine ki nongjngohkai pyrthei ka la shah pynthut namar ka jingbym ailad jong ka jinglong ka suiñbneng, bad ïa ki nongjngohkai pyrthei kiba dang sahkut lynti la sdang ban pyllait im ha ka sngi kaba bud, la ïathuh ki heh pulit.
Ïa ka jingpyllait im ïa ki briew kiba dang sahkut lynti la pynsangeh shwa namar ka jingpynthut jong ka jinghap slap. Ki la don baroh kumba 1,200 ngut ki nongjngohkai pyrthei kiba la sahkut lynti ha Lachung, ha kaba ïa kine la thmu ban shu kit da ki liengsuiñ, hynrei na ka jingpynthut jong ka suiñbneng ka jingthmu baroh ka la pulom.
Ha kaba nyngkong jong ka jingpyntreikam, la ïoh ban pyllait ïa ki 9 ngut ki nongjngohkai pyrthei ha kaba ïa kine la ïalam sha Mangan lyngba ka surok, bad kiwei pat ki 55 ngut ki la leit lang bad ki kham hadien, la ïathuh ki heh ba dei khmih.
Ki bor pynïaid distrik, ki la buh ïa kiba bun ki jingkieng ba la pun najrong ki jaka ba la twa khnang ban ïoh ban pynïaid ïa ki briew da ki kjat bad da ki kali katba shah ki jaka, ki la ong.
Ïa ka jingpyllait im ïa kine ki lanot la lamkhmat da u District Magistrate Hem Kumar Chettri, ha kaba la ïatreilang bad ka kynhun jong ki pulit, ka Forest Department, BRO, NDRF bad ki nongpynïaid shnong ha ka thaiñ, la bynrap shuh shuh ki heh ba dei khmih.
