Ka rai jong u MP ka seng Congress, u Rahul Gandhi, ban iehnoh ïa ka jinglong nongmihkhmat sha Parliament na Wayanad konstitwensi ha Kerala, bad ban mihkhmat ïa ka Rae Bareli ha Uttar Pradesh, bad ka jingmynjur jong ka para jong u, ka Priyanka Gandhi Vadra, ban ïakhun na Wayanad, ka lah ban nang pynktha khlieh ïa ka BJP kaba ïalam ïa ka sorkar National Democratic Alliance (NDA). Naduh u snem 2014, ngi la ïohsngew ba ka BJP ka kwah ban pynduh jait ïa ka seng Congress na India. Ha ka ilekshon MP ha u snem 2014 bad 2019, I kumba kan thap long shisha namar ka BJP ka la jop kput ha kiba bun ki jaka. Hynrei ha kane ka ilekshon mynta u snem, ki paidbah ki la ai lyer biang ïa ka Congress da kaba pynjop 99 ngut ki MP. Kane ka la pynshaïong ïa ka BJP namar ka la kob ba kan ïoh palat 300 ngut ki MP tang nalade. Hynrei ka paw ba ki paidbah ki kham stad bad sian ban ïa kane ka seng saiñpyrthei kaba la pynbna ba ka dei ka seng saiñpyrthei kaba heh tam ha pyrthei.
Ka Priyanka ka la dei lypa kawei na ki General Secretary ka All India Congress Committee (AICC) bad ka la ïadon bynta ha ka jingïalap ilekshon na ka bynta ka Congress la bun snem watla kan dei ka sien banyngkong ïa ka ba kan ïakhun ïa ka ilekshon. Kumba u Rahul u la jop kput na Wayanad, lehse kan ym don jingeh ïa ka Priyanka ba kan shah jied kum ka MP sha Lok Sabha. Lah ban kdew ba u Rahul u la jop da 3,64,422 ‘vote’ ïa ka kyrtong ka seng CPI (M), ka Annie Raja, ha ka ilekshon kaba dang shu dep katba u kyrtong ka BJP u la wan ha ka kyrdan kaba lai. Lada ka lyer na ka bynta ka seng Congress kan ïaineh kumba ka la long ha ki khyndiat taïew mynshwa, ka Priyanka kan jop da kaba suk ha ka ilekshon shiteng samoi.
Ngi lah ban pynkynmaw ba ka Congress, khlem ki Gandhi, kan ym lah ban shan slem. Kane ka dei ka seng kaba la sei ïa ki nongïalam bad ki Myntri Rangbahduh kum u Jawaharlal Nehru, ka Indira Gandhi, u Rajiv Gandhi bad kiwei. Lait noh u Nehru, ka Indira bad u Rajiv ki la mad ïa ka jingshah rem ha ki ilekshon. Hynrei ki la lah ruh ban wanphai biang sha ka bor. Kane ka jingbym lah jong ka Congress ban pynïakhlad ïalade na ki Gandhi ka dei namar ka sngewthuh ba khlem ma ki, ka seng kan ym poi shano-shano. Ngi kynmaw ba dei ka Sonia Gandhi kaba la ïalam ïa ka seng ha ka ilekshon ha u snem 2004 ban ïakhun pyrshah ïa ka BJP, bad hadien ka jingñiew ‘vote’, ka Congress ka la lah ban ïalam ïa ka sorkar United Progressive Alliance (UPA) ha kaba u Dr Manmohan Singh u la long kum u Myntri Rangbahduh. Ha u snem 2009 ruh, kane ka kynhun synrop ka la wanphai sha ka bor. Tangba ki jingshah kynnoh bamsap bamngem kiba bun rukom ki la pyntroiñ ïa ka Congress bad ka la pynsuk ïa ka BJP ba kan wanphai biang sha ka bor synshar ha ryngkat ka jingjop bun ngut ki MP.
Hynrei naduh u snem 2014 ka Congress ka la hap ban shong ha ka liang pyrshah hadien ka jingjop kput jong ka BJP. Ka BJP ka la kob ba ka kwah ban pynjah kyrteng ïa ka Congress, hynrei haduh kane ka khyllipmat, ka jingthmu jong ka, kam pat urlong satia. Ngim tip la kan urlong ne em, hynrei lada peit na ka jingmih na ka ilekshon MP mynta u snem, ngi sngewthuh ba kan nang jwat ïa ka BJP ba kan poi sha kata ka thong ba ka la buh. Ka Parliament ha kane ka kynti kan ym long shuh kumba long ha kine ki 10 snem ba la leit noh namar ka liang pyrshah ka la khlaiñ biang. Ha kine ki 10 snem, ka liang synshar ka la kheiñ troiñ ïa ka liang pyrshah bad kam shym la don ka jingburom ïa ka sur kaba kren pyrshah ïa ki aiñ rew ba wanrah ka sorkar lane ïa ki jingleh jingkam jong ka sorkar. Kaba kum kane, ha ka jingshisha, kam dei ban ïohlad ha ka Ri synshar paidbah. Tangba ka jingbakla ka dei jong ki paidbah namar ki la pynkhlaiñ palat tang shiliang. Ha ka synshar paidbah ngi donkam lang ïa ka sorkar kaba khlaiñ bad ba skhem, bad ka liang pyrshah kaba khlaiñ.
Ha kine ki snem, ngi kynmaw ba ka BJP ka la beh thong ïa ki Gandhi ha ki rukom bapher-bapher. Hynrei haduh mynta, ka khlem pat lah ban leh eiei pyrshah ïa ki. Ka la wanrah shibun bah ki jingkynthoh bad jingkynnoh tangba ki paidbah ki dang pynjop hi ïa ki. Ngi kynmaw ba u Rahul u ju kynthoh jur ïa ka BJP hapoh Lok Sabha, bad lada wan sha ka Priyanka, ka sur jong ka Congress kan nang khlaiñ. Hynrei tang ka por hi ka ban sa batai shai ïa kiei-kiei baroh.
