Shillong, Jylliew 19
Ka Christian HSS, Nongjri Presbyterian bad ka Mynken Christian HSS ki la long ki lahduh ha ka District Level Inter School Subroto Mukherjee Cup Football Tournament 2024 ba la pynïaid da ka shlem treikam u District Sports Officer (DSO) Ri Bhoi.
Ha ka jingïakhun final jong ka Under-17 ki kynthei kaba la long ha madan Nongjri kaba ha Ri Bhoi District, ka Christian ka la lah ban pynliem noh ïa ka Saiden SS lyngba ka tie-breaker da 4-2 kol. Kumjuh ha ka Under-15 ki shynrang ka Nongjri Presbyterian ka la pynliem ïa ka Myngken Christian HSS lyngba ka tie-breaker da 5-4 kol. Katba ha ka under-17 ki shynrang ka Myngken Christian ka la lah ban pynliem noh ïa ka Nongjri Presbyterian da 1-0 kol.
Ïa ka nam Best Player ha ka U-17 la khur da ka Pynibha Rongthaluh na ka Christian HSS bad u Saiñdur Rynjah na ka Myngken Christian, katba ha ka U-15 la khur da u Banteilang Malieh na ka Nongjri Presbyterian.
Te kumta ka Christian, Nongjri Presbyterian bad ka Mynken Christian kin mihkhmat ïa katei ka district sha ka State Level Subroto Cup ka ban sa long shen ha kane ka nongbah.
