Shillong, Jylliew 19
Ki dkhot ka Shillong Sports Association (SSA) hapoh ka jingïalam u President u Bah Banteidor Lyngdoh, kumjuh u Chief Engineer ka State Sports Council of Meghalaya (SSCM) Bah B. Syiem lem bad u Contractor u Bah Larsing Ming Sawyan, ki la leit ban jurip ïa ka jingsiang ïa u phlang plastik ne artificial turf ha SSA Stadium kaba ha First Ground, Polo ha ka sngi Balang.
Kane ka la wan hadien kumba shi snem ba la lah ban pyndep ïa katei ka jingsiang phlang plastik. Kumta lyngba ka jinghap jong u slap baroh shimiet bad kumjuh ha ka step jong ka sngi Balang, kane ka kynhun ka la lap hi da la ki jong ki khmat kaba paw shai kdar ïa ka jingpyntrei torti ha ka rukom siang ïa utei u phlang plastik kaba la kot kumba T. 5 klur tam.
Ha katei ka jingjurip la lap ïa ki dak ki shin kiba la paw shai kdar ha katei ka stadium ha kaba ka um ka la lang ha kiba bun ki bynta jong ka madan. La ïohi ruh ba u rubber sand u la tuid lut kat shaba kit ka um. Kane ka jingdap um ha katei ka madan ka lah ban dei na ka daw ka jingbym biang ki jaka ban pyntuid ïa ka um khamtam ha kane ka por slap.
Na ka liang u President ka SSA u Bah Banteidor Lyngdoh u la pynpaw ba ba kum ka synjuk kam shym la hun halor kane ka jingpyntrei namar ki don shibun ki jingduna ka rukom pyntrei ban siang ïa u phlang plastik. “Ngi la lap ïa ki jingduna ha ka rukom pyntrei ha kaba um kam ïaid bha kumba ka dei ban ïaid bad kane ka rukom pyntrei kam shym la pynhun ïa ngi kumba ngi khmih lynti.”
“Kane ka long kaba bha tam eh lyngba ka jingwan jong u slap ka la paw shai kdar ki jingduna hapoh kane ka stadium bad donkam ban pynbeit ïa kine baroh. Watla na ka liang u Chief Engineer ka SSCM u la kular ban shim khia halor kine ki jingduna, hynrei ngi donkam ban phah da ka jingthoh sha ka SSCM khnang ba ki lah ban pyndep ha ka por kaba biang bad ba kan ym ktah ïa ki lympung ïalehkai kiba ka SSA kan sa sdang nangne shakhmat ha katei ka stadium,” u la bynrap.
“Ngi na ka liang ka synjuk ym dei ba ngi la hun ïa kane ka rukom pyntrei, hynrei ngi kwah ban ïohi ïa ba kam kan long janai khnang ba kan ym ktah yn sa sdang ki lympung ïalehkai jong ngi,” la bynrap u Bah Lyngdoh.
