Nongstoiñ, Jylliew 19
Ka Don Bosco SS Mawkhlam bad ka Dapboklang Giri Memorial SS ki la jam sha ka semi final ha ka kyrdan ïalehkai Under 17 ki shynrang jong ka West Khasi Hills District Level Inter School Subroto Mukherjee Cup Football Tournament 2024 ba la pynlong da ka shlem treikam ka District Sports Officer (DSO).
Ha ka jingïalehkai quarter final kaba khaduh jong ki Under 17 ki shynrang kaba la long ha ka sngi Balang ha madan New Nongstoiñ, ka Don Bosco ka la pynliem noh da 1-0 kol ïa ka St. Xavier SS, katba ka Dapboklang Giri Memorial ka la jop da 2-1 kol ïa ka Rev.JJM Nichol Roy SS.
Na ka liang ka shlem treikam jong ka DSO, West Khasi Hills ka la pyntip ba ka jingïalehkai semi final jong kane ka lympung kan long ha ka sngi Thohdieng (21 tarik) ha kaba ha madan New Nongstoiñ. Ha ka Under-15 ki shynrang kan long hapdeng ka Lurmangkara SS, Risiang pyrshah ïa ka St. Anthony’s SS, Jaidoh ha ka por 10 baje mynstep, katba ha ka Under-17 ki shynrang pat kan long hapdeng ka Sibsingh Memorial Govt. ïa ka Don Bosco SS, Mawkhlam ha ka por 12 baje bad ka Joel Gatphoh HSS, Kynroh ïa ka Dapboklang Giri SS, Porla ha ka por 2 baje janmiet..
Nangta, ha madan NDSA kaba ha Nongpyndeng pat kan don ka jingïalehkai semi final jong ki Under-17 ki kynthei hapdeng ka Kyrshai UP & LP School pyrshah ïa ka Don Bosco Mawkhlam ha ka por 10 baje mynstep, katba ka Sibsingh Memorial Govt ïa ka Dapboklang Giri Memorial ha ka por 12 baje.
Shuh shuh ha ka por 2 baje janmiet kan don biang ka jingïalehkai semi final jong ka Under -15 ki shynrang hapdeng ka Borsingh Memorial ïa ka Dapboklang Giri SS, Porla.
