Seoul, Jylliew:
U President ka Russia ha ka Sngi Balang u la ai khublei ia u nongialam ka North Korea- u Kim Jong Un hadien ka jingiakynduh ba markhmat jongki kaba la long ha katei ka sngi hadien ka jingpdiang sngewbha kyrpang ia ka jingleit poi jong u Putin sha Kim Il Sung Square hapoh North Korea.
Kumta, la ong ba ka kynhun shipai ba kyrpang ha ryngkat ki paidbah nongshong shnong, ki la leit ban ialum lang ha katei ka jaka ban sakhi ia katei ka jingpdiang burom jong ka North Korea ia utei u nongialam ka Russia habar katei ka jaka kaba don hajan ka wah Taedong River bad kaba iaid lyngba ia katei ka nongbah.
Ha katei ka sngi, la iohi ruh ia ki khynnah kiba bat ia ki balloon ha ka kti jongi kum ka dak ka jingkmen ia ka jingleit jong utei u nongialam ka Russia sha katei ka ri bad la iohi ruh ia ki pla card bad ki dur kiba heh ba la rah da ki paidbah bad ha kitei ki dur la don u nongialam ka Russia bad utei u nongialam ka North Korea bad kane ka pyni shai ia ka jingiadei kaba iajan hapdeng jong kitei ki 2ngut ki nongialam jong kitei ki arliang ri.
Hadien kata, la ong ba u Putin bad u Kim ki la leit pat sha ka Kumsusan Palace naka bynta katei ka jingialang ba la pynbeit da kitei ki arliang ri.
Hadien katei ka jingialang, u Putin u la ai khublei ia ka jingkloi jong ka North Korea ban iatrei lang bad ban ai jingkyrshan ia ka Russia halor ki kam- ki jam bad ki rai jongka wat hapdeng ka jingshah kynthoh jur namar ka thma pyrshah ia ka Ukraine.
