Guwahati, Jylliew:
Ka Assam ïa mynta ka dang ngat ha ka jingshah ktah jur na ka shlei um bad twa khyndew, ha kaba kane ka la ktah lajan 3 lak ngut ki briew ha kylleng ka jylla. Kumba la ïathuh ka tyllong khubor ba la wan na ki heh ba dei khmih na ka Assam State Disaster Management Authority (ASDMA), la ong ba ki la don kumba 2,96,384 ngut ki briew kiba la shah ktah jur ha ki 24 kynta ba la leit.
Ki la don kumba 5 ngut ki briew kiba la duh noh ïa ka jingim namar ki jingtwa khyndew ba la wanrah da ka jingjur slap. Ki la don baroh kumba 979 tylli ki shnong kiba don ha ki 48 tylli ki Revenue Circles ha ki 19 tylli ki distrik kiba la shah tap ha ka um. Ki distrik kiba la shah ktah jur ki kynthup ïa ka Kamrup, South Salmara, Goalpara, Nagaon, Bongaigaon, Lakhimpur, Hojai, Darrang, Nalbari, Karimganj, Udalguri, Tamulpur, Hailakandi, Biswanath, Barpeta, Cachar, Baksa, Bajali, bad Sonitpur.
Ka Karimganj ka la long ka distrik kaba la shah ktah jur, ha kaba ki la don kumba 2,45,379 ngut ki briew kiba la ïakynduh jingeh na ka jingshlei um. Kiwei pat ki distrik kiba la kham shah ktah ki kynthup ïa ka Tamulpur ha kaba ki la don 11,526 ngut ki briew kiba la shah ktah jur, ha Bajali da 5,671 ngut, ha Hojai da 5,272 ngut bad ha Nagaon da 5,247 ngut.
Ha ki thaiñ sor ki la don kumba 21 tylli ki shnong kiba la shah ktah jur, kine ki dei ha Kokrajhar, Kamrup, Cachar, Kamrup (M), bad Nalbari distrik. Ka Cachar bad ka Kamrup ki la long ki distrik kiba don ha ka jaka sor kiba la kham shah ktah jur ha kaba ki la don 3,105 bad 235 ngut ki briew kiba la shah ktah.
Ki la don ki jaka sah ba shipor ba la buh na ka bynta kito ki bym don jaka sah shuh ha North Guwahati, Kamrup distrik, ha kaba haduh mynta ki la don kumba 235 ngut ki briew kiba la pynlong jaka sah ha kine ki jaka. Nalor ka jingshlei um, ki jingtwa khyndew ki la ktah ïa kiba bun ki distrik kiba kynthup ïa ka Dima Hasao, Cachar, bad Karimganj, ha kaba ka la ktah ïa 46 ngut ki briew bad pynjulor ïa kumba 1.13 hectare ka jaka. Shuh shuh la bynrap da kaba ong ba ki la don kumba 28 tylli ki shnong ha ki 10 tylli ki Revenue Circle ha kylleng ka South Salmara, Baksa, Barpeta, Nalbari, Dhubri, Kokrajhar, Dima Hasao, bad Cachar distrik kiba la shah ktah jur na ka jinghap jong u slap bad ka ‘erïong. Ki jingtwa khyndew ki la ktah jur ha Nalbari, Dhubri, South Salmara, Kokrajhar, Tinsukia, bad Udalguri distrik, ha kaba ka la don kumba 7.75 hectare ka jaka ba la twa tang ha Dhubri bad Tinsukia. Ka jingshlei um ka la ktah ruh ïa 2,53,413 tylli ki jingri.
Ka la don ka jingpynkynriah jaka ïa kine ki jingri sha ki jaka ba lait na ka jingshlei um. Ki la don kumba 12,166 ngut ki briew kiba la leit sah sha ki jaka sah ba shipor kiba don ha 7 tylli ki distrik kiba la shah ktah jur na ka jingshlei um. Nalor kane la ïathuh ba ki la don kumba 10,287 ngut ki briew kiba la ïoh jaka sah ha ki Relief Distribution Centers kiba don ha Karimganj bad Nagaon.
Ha Karimganj, ki nongshong shnong, ki pulit ka tnat State Disaster Response Force (SDRF), bad ki bor sorkar ki la pyllait im ïa 73 ngut ki briew bad 25 tylli ki mrad da ki liang. Ka kynhun SDRF ka la ïoh ban pyllait im ïa ki 7 ngut ki briew bad 5 tylli ki mrad. Ha Udalguri, ka kynhun Fire & Emergency Services (F&ES) ka la ïoh ban pyllait im ïa 2 ngut ki briew da ka lieng. Kumba la sakhi, la ong ba ka Assam ka la nang ïai shah ktah jur ha kaba ïadei bad ka jingwan thombor jong ki bor ka mariang.
