Jowai, Jylliew 21
Ka North Liberty HSS ka la long kaba la pynkhreh ban ïaknieh ïa ka nam lahduh ha ki artylli ki kyrdan ïalehkai Under-17 jong ki khynnah shynrang bad khynnah kynthei ha ka jingïakhun final jong ka “District Level Inter School Subroto Mukherjee Cup Footbal Tournament 2024” ba la pynïaid da ka shlem treikam u District Sports Officer, West Jaiñtia Hills District.
Ka jingïakhun final jong kane ka lympung ïalehkai kan long ha ka 24 tarik mynta u bnai ha kaba yn wan ban ïadon lang da u MLA ka Jowai u Bah Wailadmiki Shylla kum u kongsan. Nalor ka North Liberty, kiwei de ki skul kiba la pynkhreh ban knieh ïa ka nam lahduh ki long ka Kiang Nangbah HSS na Jowai, ka Dominic English School Namdong A, St. Dominic HSS na Mookyndeng bad ka Govt. Boys HSS na Jowai.
Ha ka kyrdan ïalehkai Under-17 (Girls), ka North Liberty kan aireng pyrshah ïa ka Kiang Nangbah Govt. HSS ha ka por 9 baje mynstep. Ha ka Under-15 (Boys) ka Dominic English School Namdong-A kan ïakynduh pyrshah ïa ka St. Dominic ha ka por 10:30 baje mynstep. Katba ha ka kyrdan Under-17 (Boys) ka North Liberty kan aireng pyrshah ïa ka Govt. Boys ha ka por 1 baje mynsngi.
Haba phai sha ka jingïakhun semi final kaba la long ha madan Kiang Nangbah Stadium, Jowai ha ka sngi Thohdieng ha ka Under-17 ki kynthei, ka North Liberty ka la pynliem noh ïa ka Police Public Secondary School da 4-0 kol.
Katba ha ka Under-17 ki shynrang, ka North Liberty ka la pynliem ïa ka Sawlyngdoh HSS na Mowkaiaw da 3-0 kol. Ka Govt. Boys ka la jop da 2-1 kl ïa ka Kiang Nangbah Govt. HSS. Ha ka Under-15 ki shynrang, ka Dominic English SS ka la pynliem noh ïa ka HK. Singh Memorial SS da 1-0 kol bad ka St. Dominic ka la jop ïa ka Modern Secondary School lyngba ka tie-breaker da 4-3 kol.
