Shillong, Jylliew 21
Ka Shillong Sports Association (SSA) ka la rai ban pynlong noh da ka Championship League Cum Knockout Tournament 2024 ha u Naiwieng mynta u snem na ka bynta ban bujli noh ha ka jaka ka Meghalaya Invitation Tournament, kaba ym shym la lah shuh ban pynlong shuh la kumba phra snem.
Ïa kane ka lympung yn pynlong hadien ba la kut baroh ki kyrdan ïalehkai jong ka Shillong League khnang ban ailad pat ban ïoh ïashim bynta ha kane ka lympung.
“Kane ka jingbym lah ban pynlong shuh ïa ka Meghalaya Invitation ka dei namar ka jinglut jingsep kaba bun kaba la kot shaduh T.1 klur na ka bynta ban pynbiang ïa ki jaka sah ïa ki kynhun ki ban wan nabar jylla, kumjuh ka jingbiang ïa ka leit ka wan bad kiwei ki jinglut jingsep,” la pynpaw u Secretary u Bah D.L Nongbri ha ka jingïakren bad ki nongthoh khubor ha ka sngi Thohdieng.
U la ïathuh ba ïa ka Meghalaya Invitation la lah ban pynlong khatduh eh ha u 2016 bad haduh mynta ym shym la lah shuh ban pynlong na ka daw kiba bun ki jingeh ha ka jinglut jingsep. “Ngi sngewtynnad ba na ka liang ka Tournament Committee kaba la shong jingïalang ha ka 19 tarik mynta u bnai, ngi la ïarai da kawei ka jingmut ban pynlong noh da ka Championship League Cum Knockout. Ka jingpynlong ïa kane ka lympung kan long hadien ba la dep ban pynlong ïa baroh ki lympung ïalehkai naduh ka Fourth, Third, Second, First Division bad ka Shillong Premier League.”
Ha kaba ïadei na ka bynta baroh ki kyrdan ïalehkai, ka Committee jong ka SSA ka la rai ruh ban kyntiew ha ka liang ki khusnam pisa na ka bynta ki kynhun ki ban khur ïa ka nam lahduh bad ba wan ba-ar ha baroh ki lympung ialehkai. “Ngi la rai ruh ban siew sha ki kynhun kumba 30% na ka jingmih jong ka bai rung (collection) na ki paidbah kiba wan sakhi ïa ki jingïalehkai ha First Ground. Kane ka mut ba ka kynhun kaba jop kan ïoh 20% bad kaba rem kan ïoh 10%, hynrei lada ki kynhun ki ïakhaid kin ïoh mar 15%. Kane long kum ka jingïadon bynta lang ki paidbah kiba wan sakhi ïa ka jingïalehkai lyngba ka bai rung ka jong ki,” u la bynrap.
Ha kaba ïadei bad ka jingsaphriang ka khubor halor ka jingkynnoh ba don kiba ki klob kiba la pyrshang ban wanrah ïa ka jingpynbeit lypa ïa ki jingïalehkai ne ka ‘match fixing’ ha ka Shillong Premier League 2023, u Bah Nongbri u la pynpaw ba kum ka Tournament Committee kan hap ban bishar thuh bha ïa ka rukom ïalehkai ki kynhun bad kan pynshitom ïa kino kino ki kynhun lada ka ïoh ïa ki sakhi satar kiba biang halor kane ka jingpynbeit lypa ka jong ki.
