Lahduh ka Lotus SS & Khliehriat Presbyterian ha ka EJH District Level Subroto Cup

Haba phai sha ka Under-15 (boys) ka Khliehriat Presbyterian ka lah ban pynliem noh ïa ka Step By Step SS lyngba ka shi kol ba la thep da u Arki Langstang ha ka minit kaba...

Shillong, Jylliew 21

Ka Lotus Secondary School bad ka Khliehriat Presbyterian SS ki la rah ïa ka nam lahduh ha ka District Level Subroto Mukherjee Cup Football Tournament ba la pynïaid da ka shlem treikam jong ka District Sports Officer (DSO) East Jaiñtia Hills.

Ha ka jingïakhun final jong ka kyrdan ïalehkai Under-17 (Boys) kaba la long ha ka sngi Thohdieng ha madan Deinchynrum kaba ha Khliehriat, ka Lotus ka la pynliem noh ïa ka Wapung HSS da 2-0 kol. Kane ka nam jop ka la wan urlong lyngba ki kol ba la thep da u Shemphang Ksih ha ka minit kaba 23 bad u Timing Lyngdoh ha ka minit kaba 40.

Kumjuh ka Lotus ka la khur ruh ïa ka nam lahduh ha ka U-17 (Girls) hadien ba ka la lah ban pynliem noh ïa ka Dkhiah East SS haduh 8-0 kol. Ka Saphapaya Lyngdoh lem bad ka Risaka Phawa kiba la khur ïa ka hat-trick. Ka Saphapaya ka la thep ha ka minit kaba 4, 10 & 24 bad ka Risaka ha ka minit ba 14, 15 & 19. Katba ïa kiwei pat la thep da ka Alisha Lyngdoh (26) bad ka Diwakapaya Dkhar (20).

Haba phai sha ka Under-15 (boys) ka Khliehriat Presbyterian ka lah ban pynliem noh ïa ka Step By Step SS lyngba ka shi kol ba la thep da u Arki Langstang ha ka minit kaba 47.

Ha kane ka sngi la ïadon lang ka Kong Almo Parisha Syiem, District School Education Officer jong ka Khliehriat kum ka kongsan, kumjuh u khlur ïalehkai barim ka Jylla u Bah Eugeneson Lyngdoh, u Assistant Commissioner u Shiv Malviya (IAS), Bah S. Paslein, DSP ka East Jaiñtia Hills, Dr. P. Nongtdu, Principal ka Jaiñtia Eastern College, ki principal, ki nonghikai lem bad ka DSO Kong S. Rapsang.