Seoul, Jylliew:
Ka Russia bad ka North Korea ha kane ka kynti ki la rai ban iatrei lang na ka bynta ka bha ka miat bad ban kyntiew ia ka jinglong-jingman jong baroh ar ri lada don kino-kino ki jingeh hadien habud. Na liang ka Russia ka la kular ba kan phah wat ia ki tiar iakhun thma ne ki tiar iada sha ka North Korea lada katei kawei pat ka ri ka shah thombor ne shah pyni bor ha kiwei pat ki ri.
Kumta, la ong ba kitei ar ri ki la ia mynjur ban iatrei lang bad ban iatylli lang ban ialeh pyrshah ia kino- kino ki ri kiba pynthud ia ki ha kine ki sngi ban wan.
U nongialam ka North Korea- u Kim Jong Un bad u President ka Russia- u Vladimir Putin ki la ioh ban iakynduh markhmat bad ban shong jingialang hapoh ka nongbah Pyongyang jong ka North Korea hi, ha kine ki khyndiat sngi ba la leit naka bynta ban pynskhem ia ka jingiadei bad ban nang pynjur ruh ia ka jingiatrei lang nangne shakhmat namar kumba la iohi hi ia ka jinglong- jingman ha kine ki sngi, kitei ki ar tylli ki ri ki dei ki ri kiba la shah peit khmat bha ha kiwei pat ki ri jong ka pyrthei nalor ka jingiabuh shun jongki bad ka United States.
