Pynliem ka Austria ïa ka Poland, don jingkyrmen ban rung pre-quarter

Te kumta ka Austria kan hap ban ïakhun tyngeh ha ka jingïalehkai kaba khatduh pyrshah ïa ka Netherlands ha ka 25 tarik, katba ka France ïa ka Poland.

Shillong, Jylliew 21

Ka Austria ka la lah ban pynliem noh ïa ka Poland da 3-1 kol na ka bynta ban wanphai da ka jingjop ha ka Euro 2024 ha ka sngi Thohdieng ha Olympiastadion kaba ha Berlin.

Kane ka nam jop ka la wan urlong lyngba u Gernot Trauner, Christoph Baumgartner bad u Marko Arnautovic na ka bynta ban pynlong ïa ka Austria ban dangdon hapdeng ka jingïaknieh ban ïoh rung sha ka pre-quarter final na ka Group-D.

Te kumta ka Austria kan hap ban ïakhun tyngeh ha ka jingïalehkai kaba khatduh pyrshah ïa ka Netherlands ha ka 25 tarik, katba ka France ïa ka Poland.

Kine ki kynhun ki dei kiba la mad ïa ka jingshah rem ha ki jingïalehkai ba la lah. Ka Austria ka la lah ban ïalehkai bha ha kane ka jingïakhun kaba ar bad ka la ïoh ban pynkhih jar nyngkong lyngba u Gernot Trauner (9). Hadien shiteng kynta ka Poland ka la lah ban pynïakhaid kylla lyngba u Krzysztof Piatek (30).

Ha ka kylla miet ka Austria ka la ioh ban thep biang ïa ka long kaba ar lyngba u Christoph Baumgartner ha ka minit kaba 66 bad ia ka kol kaba lai la thep lyngba ka penalty ba la shut da u Marko Arnautovic (78). Haduh kaba kut ka jingïalehkai ka Poland kam shym la lah ban pynphai bad ka la mad ïa ka jingshah rem.