New Delhi, Jylliew:
Ki nongïalam jong ka seng AAP bad ki nongïalam ka liang pyrshah ha kylleng ka ri ki la pynpaw ïa ka jingkmen kaba khraw bad ki la leh kmen ha kylleng ki jaka namar ka rai ba la pyllait jamin ïa u Myntri Rangbah jong ka Delhi u Arvind Kejriwal ha ka Sngi Palei halor ka mukotduma jong ka jingshah kynnoh pyndkoh treikam hapoh ka tnat Excise.
Ka ïingbishar ha Delhi ka la pyllait jamin ïa u Kejriwal halor ka jingshah kynnoh ba u la kamai ïa ka spah bymhok ha kaba u la shahkem ha ka 21 tarik, Lber bad u la shah set patok ha Tihar Jail.
U nongbishar bakyrpang u Niyay Bindu u la pyllait jamin ïa u nongïalam jong ka seng AAP ha ryngkat ka jingïakut kaba long T. 1 lak.
Ka ïingbishar ka la kyntait ïa ka jingkyrpad jong ka kynhun ED ban pynsangeh ïa ka hukum da kumba 48 kynta.
Kum shi bynta ban pynpaw ïa ka jingsngew-kmen halor kane, u Myntri Rangbah jong ka Punjab u Bhagwant Mann u la sngewbha bad ong “ba nga don ka jingshaniah ha ka ïingbishar…u Kejriwal u la shah pyllait jamin…ka long shisha ka jingkmen bad ka jingïarisa,” ïa kine ki kyntien u la kren ha ka jingpyllait khubor ha ka rynsan X.
U Myntri jong ka Delhi u Saurabh Bharadwaj u la pyllait ïa ka durkhih kaba la batai shai halor ka jingjia bad ka rai jong ka jingshah pyllait jamin, u la thoh, “Hapoh ka jingtreikam jong ka PMLA, kiba bun ki briew ki la ïoh jamin tang na ka Supreme Court, borabor ki ïingbishar kiba kham hapoh kim ju kham pyllait jamin. Ha ka jingïatyrko nia, u ASG jong ka sorkar kmie u la ong ba haba ym don kino kino ki sakhi, ngi la pynsakhi da ka sorkar bad na ka bynta kane ngi la hap ban ai pisa ïa ki. Namar kane ka la paw shai ba ka sorkar kmie kam don kano kano ka sabut ban pynshisha halor kane ka jingjia.”
U nongïalam jong ka seng AAP u Sanjay Singh uba la shah set patok hashwa ha kajuh ka jingjia u la ïathuh ha ki nongthoh khubor kumne, “ka jingshah pyllait jamin jong u Arvind Kejriwal kan sa nang pynkhlaiñ ïa ka jingsynshar paidbah. Kane ka long ka khubor babha na ka bynta ka ri bad ki briew jong ka Delhi. Ki jingkynnoh jong ka kynhun ED haduh mynta ki la paw ba ki long kiba thok. Kane ka dei ka jingkynnoh bymhok kaba long pyrshah ïa u Kejriwal.”
U MP jong ka seng AAP na Anandpur Sahib, u Malvinder Singh Kang, u la ong ba kane ka dei ka jingjop kaba khraw jong ka jingsynshar paidbah.
