London, Jylliew:
Kawei ka nong Russia-America ka la shah kem ha mynta snem katba ka dang leit ban jngoh ia ki bahaiing-bahasem jong ka kiba shong hapoh Russia hadien ba ki bor pyniaid ka Russia ki la lap ia ka jingkynshew bad jinglum pisa jong katei ka briew na ka bynta ban phah jingiarap sha ka tnat shipai ka Ukraine.
Ia katei ka briew la ithuh kum ka Ksenia Karelina, kaba la kha bad heh-san hapoh Russia. Hynrei la ong ba hadien ba ka la bit- la biang bad ka la nang- la stad, ka la poi leit sah noh sha Los Angeles hadien ba ka la mih noh na Russia ban leit sah sha United States mynta la kumba 10 snem. Pynban ha kane ka por la ong ba ki bor pyniaid bad ki bor ka aiñ jong ka Russia ki la pynngat ia katei ka briew hapoh ki kyndon pynkheiñ aiñ ba la buh jong ka ri namar katei ka jingleh pyrshah jong ka ia ka Russia da kaba leit ai jingkyrshan ia ka Ukraine bad ka Russia ka shim ba kane ka long ka jingshet kylla jong katei ka briew ia la ka jong ka ri kaba ka la shong la sah bad ka la heh- la san ha ki por ba la leit. Namarkata, ka Russia ka la rai ba kan set patok ia ka haduh 12 snem kynthih lada lap ba ka don kti shisha ha katei ka kam ban pynmih pisa naka bynta ban ioh phah jingiarap sha ka tnat shipai ka Ukraine ha ka jingiakhun jongka pyrshah ia ka Russia.
Kumta, la ong ba ia katei ka mat ba iadei badka, yn pynsngap bad yn bishar da ka iingbishar jong ka Russia khlem da pynpaw paidbah hynrei yn shu wad bniah bad bishar shimet da ka iingbishar ba hakhlieh jong ka Russia.
Namar la ong ruh ba ki don kumba 12 ngut ki nong America kiba la shah kem bad shah set patok hapoh Russia, kiba la shah suba don kti ha kum kitei hi ki jingjia naduh ba la jia ka thma hapdeng ka Russia bad Ukraine mynta la katto- katne snem.
Haba iadei bad kane, la ong ba ka Federal Security Service (FSB) jong ka Rusia, ka la bat noh ia ka Karelina naduh u Kyllalyngkot jong une u snem 2024 katba ka dang leit ban jurip ia ki kmie- ki kpa bad ki bahaiing- hasem jongka kiba don hapoh ka nongbah Yekaterinburg jong ka Russia.
Kane ka long hadien ba ka Karelina ka la leit ban pynlut por ia ka shuti Tlang jongka hapoh Russia ban leit sah kais hi por bad ki bahaiing jongka shuwa ba kan leit phai biang sha US ban bteng ia ki kam- ki jam jongka kumba ju long barabor.
La ong ba ka Karelina shuwa ba kan mih na US, ka la pyntikna ia u briew uba ka don jingiadei bad ka jingleit jongka sha Russia kam shym buh jingma eiei ia ka jingim jongka bad ba um dei ban sheptieng eiei haba iadei bad ka jingleit sah jongka shipor sha Russia namar ka ju im hi hapoh Russia baroh shi katta ki snem shuwa ba kan leit sah noh sha US.
