Nongstoiñ, Jylliew 23
Ka Hynñiewtrep Integrated Territorial Organiza-tion (HITO) West Khasi Hills District ha ka janmiet jong ka 20 tarik u bnai Jylliew 2024 ka la ïoh ban bat noh ïa ki 15 ngut ki bar jylla kiba thmu ban leit trei bylla ha ki thaiñ Nongjri.
La ong ba ka jingïoh bat ïa kine ki bar jylla ka la long hadien ba ka HITO ka la ïoh ïa ka jingtip kaba thikna bad ryngkat ka jingïatreilang bad ki katto katne ki dkhot jong ka KSU.
Kine ki bar jylla ki dei na jylla Assam kynthup ïa ki longkpa bad longkmie ryngkat bad ki khyllung khynnah kiba wan lyngba ka lynti Boko sha Langpih.
Katkum ka khubor na ki nongïalam ka HITO, la ong ba kine ki bar jylla kila thmu ban leit ban trei sha ki thaiñ Nongjri, Borsora kiba khlem da biang ïa ki kot ki sla kum ki Labour Licence.
Halor kane, ka HITO West Khasi Hills kala maham tyngeh ruh ïa ki nongñiah kali tourist ba kim dei ban shu leit lane kit kulmar ïa ki bar jylla khlem da biang ki kot ki sla.
La ong ruh ba hadien kane, ka HITO ka la leit ban aiti noh ïa kine ki 15 ngut ki bar jylla sha thanad Nongstoin ba kin phah leit phai noh shi syndon sha la ki jong ki jaka na kaba ki wan.
Shuh shuh ka HITO ka la dawa ruh na ka sorkar haba ïadei bad ki check-point ne ki khyrdop talasi ki ban khmih ïa ka rung ka mih jong ki bar jylla ba kin long kiba phikir bad kitkhia bha khnang ba kane kan ym jia shuh hadien habud.
