Aizawl, Jylliew:
Na ka jingïai bteng ban pynlong ïa ki jingïakhun pyrshah ïa u drok, la ïoh ban kurup ïa u Heroin uba la kot sha ka T. 1.68 klur ha Champhai distrik kaba don ha Mizoram, la ïathuh ki pulit ka Assam ha ka jingthoh ba la phah.
Tang mar ïa ïoh jingtip halor ka jingdon jong ki nongkhaïi drok, ka kynhun ba la ïatreilang hapdeng ki shipai ka tnat Assam Rifles bad ki pulit jong ka Mizoram, la ïoh ban kurup ïa u drok uba don 240 gm na ki thaiñ jong ka shnong Jail Veng jong ka Champhai, la ïathuh ka jingthoh ba la wan na ka tnat pulti.
Ha kaba ïadei bad kane ka jingjia la ïoh kem ïa arngut ki briew kiba dei ki nongshong shnong jong ka Aizawl bad Siaha. Ïa kine ki briew kiba la shahkem bad kumjuh ïa u drok ba la ïoh ban kurup la aiti sha ki pulit na ka bynta ban leh ïa kaba donkam, la bynrap shuh shuh ka jingthoh. Ki pulit jong ka Mizoram bad ka tnat Excise and Narcotics Department (END) ki la ïoh ban kurup ïa u drok uba la kot sha ka T. 982.5 klur bad ïoh ban kem ïa 581 ngut ki briew haduh u bnai Jymmang jong u 2024.
