Shillong, Jylliew 23
U Chairperson ka National Commission for Protection of Child Rights (NCPCR), u Priyank Kanoongo u la ong ba baroh kawei ka Thaiñ Shatei Lam Mihngi bad ka phang Mihngi jong ka ri, ki long ki lanot haba phai sha ki kam khaïi briew.
“Ngim don ïa ki jingkheiñ kiba tikna halor ka jingkhaïi briew, hynrei ngi shaniah ha ki jingkheiñ ba la pynbiang da ka NCRB,” la ong u Kanoongo haba kren sha ki lad pathai khubor ha ka Sngi Saitjaiñ.
Wat la u la pynsngew ba ka tnad kam ju buh jingkheiñ haba ïadei bad katei ka bynta, hynrei ha kawei ka liang, ka lum thup ïa ki jingkheiñ halor ki jingujor kaba ka (NCPCR) ïoh pdiang.
Haba kylli, u la ong, “Haba phai sha ka Thaiñ Shatei Lam Mihngi baroh kawei bad kiwei-kiwei ki Jylla ka phang Mihngi jong ka ri – ki dei ki lanot haba phai sha ki kam khaïi briew.”
Na ka liang jong u, u la ong ba ka tnad ka la shimkhia haba ïadei bad kane bad kumba ka long mynta, la pynlong ïa ki ‘Workshop’ bapher-bapher ha ki distrik ba don ha khappud bad ki ri ba marjan kum ka Bangladesh, Myanmar bad Nepal. “Ngi ïatreilang bad ka CAPF, DCPU, ban pynsngewthuh sha ki, kumjuh ban pynbiang ïa ki prokram ‘Orientation’ halor kumno ka jingkhaïi briew ka jia,” la ong u Kanoongo.
Haba phai sha ka mat halor ka jingpyntrei bylla ïa ki khynnah, u la ong ba kam don kano-kano ka jaka ha pyrthei (baroh kawei) ka ban lait na kane ka jingeh bad kumta donkam ban trei, ban rat dyngkhong ïa ka jinglong-jingman ba ïadei bad ka jingpyntrei bylla ïa ki khynnah.
Halor ka jingdon ki khynnah kiba trei ha ki kam tih marpoh khyndew, u Chairperson u la ong ba katkum ka kaiphod hashuwa jong ka NCPCR, ka tnad ka la pynsngew ïa kane ka mat sha ki Sorkar.
“Hynrei ïa mynta, nga lah ban ong ba namar ka jingkhang ïa ki kam tih marpoh khyndew ba la pyntreikam da ki bor ba dei khmih (Pollution Control Authorities), NGT bad kiwei-kiwei, nga lah ban ong – khublei ïa kine ki bor ba dei khmih kiba la khang ïa ki kam tih marpoh khyndew. Kumta ngi lah ban ong ba ka la ïarap shi kat dei ïa ki khynnah khamtam haba ïadei bad ka jingpyntrei bylla ïa ki (khynnah),” u la ong.
Shuh shuh u Kanoongo haba jubab halor ka jingdon ki khynnah kiba tyngkhuh bad ka aiñ, u la ong ba haba phai sha ka Jylla, tang lai ngut ki khynnah ki don ha ki ‘Observation Home’. U Chairperson ka NCPCR ha ka Sngi Saitjaiñ, u la lum ïa ka jingïalang khmih bniah bad ki tnad treikam bapher-bapher jong ka Sorkar halor ki hok jong ki khynnah hapoh ka Jylla.
