Shillong, Jylliew 23
Ki bahaïing bahasem ki la ïoh ban ïakynduh biang ïa ka Kong Ranjita Lyngkhoi, 40 snem ka rta na ka shnong Sakwang-Maw-kyrwat kaba hap ha South West Khasi Hills District hadien ba la lap ïa ka katba ka dang ïaid lynti marwei hapdeng ka jingjhieh ka met baroh shi rynïeng namar ka jingther u slap ha ka Sngi U Blei.
Haba ïakren bad u Bah Poland Sohphoh uba dei bahaïing, u la ïathuh hadien ba la pynmih ïa ka khubor, ki bahaïing bahasem, ki para shnong na Sakwang bad ki paralok kiba sah ha Shil-long ki la ïa wad baroh shimiet jong ka Sngi Saitjaiñ haduh mynta ka Sngi U Blei.
U la pynpaw ka jingsngewphylla namar ki don ki para shnong kiba wan khnang sha Shillong hynrei ki mut ban leit sha Nongpa-thaw, hynrei mar shu poi ha Umïam kim lait lynti namar ba twa khyndew. Kumta haba ki mut leit noh sha ïing ha Mawlai kim don shabi bad kumta ki la leit ban shim ïa u shabi na Lawmali.
U la pyntip mar shu ïaid lynti na Wahumkhrah kaba don mar shiliang bad ka Wahingdoh ha ka por 4:00 baje janmiet la ïohi ïa kane ka Kong Ranjita kaba la ïaid marwei bad jhieh lut baroh shimet bad hangta hi khlem da ïakren slem u la ïalam noh sha ïing jong u Bah KD Ramsiej.
“Haba la wan lam sha ïing, ngi la pynsum pynsyaid bad pynphong sopti bad ai bam namar ar sngi shimiet ka khlem bam” u la ong.
U la ïathuh ba ha ka por janmiet jong ka Sngi Saitjaiñ haba ki leit peit ïa ka khun kaba dang shah sumar ha Nazareth Hospital Shillong ka la wan her ka sim bad la kem ïa ka hynrei la pyllait noh.
U Bah Poland u la pyntip ba ïa kane ka khun kynthei la wan ap bujli noh da ka para jong ka kmie kaba la jah.
Kum ban shu pynkynmaw, ka Kong Ranjita ka la wan ïalam phah sumar ïa ka khun ha Nazareth Hospital naduh ka 16 tarik Jylliew 2024 ha ka por janmiet. La shu antad ba ka jah dei ba ka la pyrkhat eh haba ka khun ka shitom khie shit mynta la shi taïew. Ka Kong Ranjita ka don saw ngut ki khun bad uba khatduh u dang dap 1 snem, bad kane ka khun kynthei ba wan sha sumar ka dang 12 snem.
Katkum ka CCTV, kane ka longkmie ka la mih na kamra ba ka ap ïa ka khun ha ka por 4:00 baje mynstep (Sngi U Blei) bad ka leit beit-beit sha phyllaw bad mih sha surok kaba la don lypa kawei ka kali tourist.
Haba ki bahaïing ki la leit wad la don kiba ïohi ba ka ïaid marwei kum ka biej kaba tawah da ka jaiñ.
