Imphal, Jylliew:
U Myntri barim jong ka seng AIADMK u K Veeramani u la kynthoh jur halor ka jingrem jong u kyrtong na ka seng BJP u AC Shanmugam ha ka jingïakhun ïa ka ilekshon Parliamentary ha Vellore ha kaba u la ong ba kane ka long kum ka jingshet kylla jong ka seng AIADMK.
Ha ka jingai jingkren jong u ha kawei na ki jingïalang ba la pynlong ha Vellore, u Veeramani u la ong ba ki dei ki jingïasuhbuit sniew bad ki rukom kren jong u Shanmugam kaba la pynisih ne duh jingshaniah na ki nongkyrshan jong ka seng AIADMK, ha kaba kane ka la long ka daw jong ka jingshah rem jong u.
Ha ka jingïakren bad ki nongthoh khubor, u Veeramani u la pynshai da kaba ong ba lada u Shanmugam bad ka seng BJP kin ïatreilang bad ka seng AIADMK, khlem pep kin sa ïoh ïa ka jingjop ka ban long da 100%.
Shuh shuh u la ong ba kiba bun ki briew ha Tamil Nadu kim sngewtynnad ïa ka seng BJP, ha kaba kane ka la ai jingmyntoi ïa ka seng DMK.
Haba ai jingkren halor ka jingbym ïashim bynta jong ka seng AIADMK ha ka ilekshon ha Vikravandi, u Veeramani u la kdew shai da kaba ong ba baroh arngut ki Myntri Rangbah barim kiba kynthup ïa ka J Jayalalithaa bad u M Karunanidhi hashwa ki la pep ban ïashim bynta ha ki ilekshon shiteng samoi.
U Veeramani u la pynshai da kaba ong ba ka seng AIADMK ka la ïatylli hapoh ka jingïalam jong u Edappadi K Palaniswami bad ka la don ka jingïohi jngai ban sa jop ha kiba bun ki konstiwensi ha ka jingïakhumn ïa ka ilekshon Assembly ban wan ha Tamil Nadu.
U la pynpaw ka jingsngew skhem ban ïohbiang ïa ka kynhun nongïalam hapoh jong u, khamtam ha Vellore distrik, bad ban pynlong Myntri Rangbah biang ïa u EPS.
