Shillong, Jylliew 23
Ka Belgium ka la khur ïa ka jingjop kaba nyngkong ha ka lympung Euro 2024 hadien ba ka la lah ban pynliem noh ïa ka Romania ha ka jingïalehkai kaba la long ha ka miet Sngi Saitjaiñ ha Cologne.
Kane ka jingjop jong ka Belgium ka la wan lyngba ka kol kaba la ïoh ban thep da u Youri Tielemans tang ha ka sekhon kaba 73 mar ïasdang ka jingïalehkai bad ka kol kaba ar ba la thep da u Kevin De Bruyne ha ka minit kaba 79. Kane ka jingjop ka la long kaba donkam bha na ka bynta ka Belgium namar ka la tip lypa lada ka shah rem kan pynlong ïa kane kynhun ban song noh ïa ki tum ki tam ban leit phai ïing.
Kumba long mynta haba phai sha ka Group-E, baroh saw tylli ki ri ba kynthup ïa ka Belgium ki don mar 3 point. Kumta ka jingïalehkai ha ka bynta kaba lai kan long kaba itynnad bha, ha kaba baroh saw tylli ki ri kin ïakhun tyngeh ban ïoh rung pat sha ka pre quarter-final jong kane ka lympung. Ha kane ka jingïalehkai ka Belgium ka la don lypa ha ka jingtynjuh kaba khraw hadien ba ka la shah liem ha ka jingïalehkai ba nyngkong pyrshah ïa ka Slovakia, hynrei ki rang ïalehkai jong ka, ki la lah ban pynpaw ïa ka rukom ïalehkai kaba tbit bad ïoh jingjop syndon.
