Shillong, Jylliew 24
U Myntri Rangbah, u Conrad K Sangma, ha ka Lah Sngi U Blei u la ïakynduh ïa kiba bun ngut ki Myntri Sorkar Pdeng ha nongbah New Delhi ban ïakren halor ki kam pynroi na ka bynta ka Meghalaya.
U Conrad u la ïakynduh ïa ka Myntri pla tyngka, ka Nirmala Sitharaman, bad u la ïakren halor ka “Meghalaya Economic Growth Accelerator (MEGA) Corridor Project”. Na ka liang u Myntri Rangbah u la kyrpad ïa ka Sitharaman ba kan ai jingïarap na ka tnat jong ka ïa kane ka projek bakongsan na ka daw ba kan wanrah ïa ka jingkiew ha ka ïoh ka kot jong ka jylla.
Nalorkata, u Conrad u la ïakynduh ïa u Myntri ba dei khmih ïa ka tnat Commerce & Industry, u Piyush Goyal, bad u la pan jingkyrshan na ka bynta ban pynkiew ïa ki kam karkhana ha Meghalaya. Ha kajuh ka por, u la ai khublei ïa u Myntri halor ki jingai jingkyrshan kiba na ka por sha ka por ban kham pynkiew ïa ki kam karkhana.
Shuh shuh u Myntri Rangbah u la ïakynduh ïa u Myntri ka tnat Development of North Eastern Region (DoNER), u Jyotiraditya Scindia, bad ha kane ka jingïakynduh, u la pan jingkyrshan na ka tnat ban bei tyngka halor ki projek kiba bun ha Meghalaya. Nalorkata, u la kyntu ïa u Myntri ban pyrkhat halor ka jingdonkam ban pynkiew ïa ka jingai bhah pisa hapoh ka tnat DoNER sha baroh ki jylla ka thaiñ Shatei Lam Mihngi.
Ha ka jingïakynduh ïa u Myntri ba dei khmih ïa ka tnat Skill Development, u Conrad u la pyni ha u ïa ka jingthmu ban shna ïa ka Skill Park ha Shillong bad Tura. Ha kine ki shlem, ka jingthmu ka long ban ai jinghikai ïa ki samla ka jylla ba kin long kiba tbit ha ka sap ka phong kaba ki don khnang ba kan plie lad ïa ki ha ka ïoh kam ïoh jam.
Ha kane ka sngi, ka la don ruh ka jingïakynduh bad u Myntri ka tnat IT, u Ashwini Vaishnaw, bad na ka liang u Conrad u la ïakren halor ki sienjam kiba ka sorkar jylla ka la shim ban pyntreikam da ki kor ki bor ban pynsuk ïa ka jingai jingshakri ïa ki paidbah.
Shuh shuh u Conrad u la ïakynduh ïa u Myntri ka tnat pule dangle, u Dharmendra Pradhan ban ïakren halor ka jingpyntreikam ïa ki projek bapher-bapher ha jylla ha kaba ïadei bad ka jingpynkiew ïa ka pule puthi. Ha kajuh ka por, u la pan jingïarap na ka Sorkar Pdeng ban kyrshan ha ka jingnang pynbha ïa ka pule ka dangle ha Meghalaya.
