Gaza Strip, Jylliew
Ki khynnah pule jong ka Palestine kiba shong ha ka nongbah Gaza, la ong ba ki la thut bad duh noh ia ka jingpule jong ki kaba la dei ban long ha une u bnai Jylliew kumba ju long ha kiwei pat ki ri. Hynrei namar jong ka thma Hamas bad ka Israel hapoh Gaza, kitei ki khynnah- samla kiba dang dei ban pule bad ban pynurlong ia ki jingthmu bad jing-angnud jong ki, ki la shu duh ei noh ia ka bynta ba kongsan jong ka jingim jong ki bad kata ka long ka pule- puthi bad ka jingnang-jingstad kaba ki briew ha kane ka juk ki donkam bha khnang ba kin lah ban pyniadei bad ka rukom im jong kane ka pyrthei mynta.
Ka tnat pule- puthi jong ka sorkar Hamas kaba synshar ia ka nongbah Gaza Strip, ka la pyntip ba 85% na ki jaka pule kiba don hapoh katei ka nongbah Gaza, ki la julor lut bad kim lah shuh ban treikam ne ai jinghikai ia ki khynnah pule jong ka ri kumba ju long baroh shi katta.
Uwei pat u khynnah 18 snem uba la ioh ban iakren bad ki nongthoh khubor na ka distrik Khan Yunis jong ka phang Shathie ha Gaza, u la iathuh ba haduh mynta utei u khynnah u dang iai bteng ban trei shitom bad ban pule ia ki kot pule jong u watla um shym lah ban ioh pyndep ia katei ka eksamin kaba u dang ap khmih lynti haduh kane ka kynti. Kumta, utei u khynnah u la pynpaw ia ka jingsngewsih kaba khraw namar ka jing- angnud jong u ban ioh ia ka jingnang- jingstad kaba la pulom bad sep-ei noh namar ka jingleit hiar thma ba khlem sangeh jong ka Israel ia ka Hamas hapoh Gaza.
Shuh shuh ruh utei u khynnah u la iathuh ba ki khynnah- samla kiba dang pule ha katei ka nongbah, ki dang ap khmih lynti ban ioh ban bteng biang ia ka jingpule jong ki da kaba kyrmen skhem ruh ba kane ka thma kan ym neh slem. Hynrei, ki la shu im hapdeng ka jingduh jingkyrmen namar ia mynta hi kim tip shuh sa katno kin dang hap ban im hapdeng jong ka thma bad sa katno kin dang hap ban shong sah dum namar kim ioh shuh ia ka jingnang- jingstad kaba ki dei ban ioh kumba long kiwei pat ki khynnah ha kiwei ki ri.
Mynta la kumba 9 bnai ba ka thma ka Israel ka la neh hapoh ka nongbah Gaza naduh ba ki lehnoh Hamas ki la leit ban thombor ia ka Israel ha ka 7 tarik u Risaw jong u snem ba la leit, ka jingdon kiba khlad na katei ka thma hapoh Gaza ka la kot ia ka 37,598 ngut, ha kaba kham bun hi ki dei ki ‘riew paidbah.
Kumta, katei ka tnat pule- puthi kaba dei khmih hapoh ka nongbah Gaza, ka la pyntip ba kumba 75% na ki jaka pule kiba don hapoh ka nongbah, ki dei kiba donkam ban pynbha noh shwa bad ki bym pat long ne ibit ban bteng ia ka jingpule bad jingai jinghikai kumba ju long barabor.
