ïoh kurup ki pulit ka Assam ïa u Ganja ba T. 1.5 klur ha Karimganj distrik

Guwahati, Jylliew:

Ki pulit jong ka Assam ki la ïoh ban kurup ïa uba bun u Ganja uba la kot sha ka T. 1.5 klur na kawei ka trok ha Karimganj distrik. Ha kane ka jingjia uwei u briew ba la tip kyrteng kum u Amit Kumar u la shahkem.

Hadien ba la ïoh jingtip halor ka jingdon jong ka kali kaba kit ïa u Ganja, ka kynhun pulit na Churaibari ka la pynap shrip bad ka la ïohbat ïa ka trok kaba don ïa u Registration Number HP-17E-9474 ha ka thaiñ Churaibari ha Karimganj distrik kaba ha khappud Assam-Tripura ha ka janmiet jong ka sngi Saitjaiñ.

“Ha ka por ba la pynlong ïa ka jingkhmih bniah la lap ïa 94 tylli ki song jong u Ganja uba don ïa ka jingkhia kaba 8.6 kg na kane ka trok. Ngi la kem ïa u briew ba la tip kyrteng kum u Amit Kumar uba na Himachal Pradesh. Kane ka trok ka wan na Agartala, Tripura, bad thmu ban leit sha Bihar. Ka dor lada die ïa une u Ganja kan long da kumba T. 1.5 klur,” la ong u Pranab Mili, uba long u heh pulit jong ka Karimganj distrik.

Ki pulit jong ka Karimganj ki la buh jingthoh ha kaba ïadei bad kane ka jingjia, ka jingtohkit ka dang ïaid shakhmat.

Ha kawei pat ka jingjia, la ong ba ki pulit jong ka Assam ki la ïoh ban kurup ïa u Heroin uba la kot sha ka T. 5 klur ha Cachar distrik. Ki pulit ki la ïoh ruh ban kem ïa uwei u briew ha kaba ïadei bad ka jingjia.

Kumba la ïathuh ka tyllong khubor, la ong ba ha kaba ïadei bad ka jingïoh jingtip halor ka jingdon jong ki nongkhaïi drok, ka kynhun jong ki pulit ka Cachar distrik ka la pynlong ïa ka jingpyntreikam kaba kyrpang ha Chalchapra, NH 37, ha ka sngi Saitjaiñ bad ki la lap ïa kawei ka Autorickshaw kaba don ïa u Registration Number AS-11EC-4513.

“Ha ka jingwad bniah, ki pulit ki la lap ïa 47 tylli ki song jong u Heroin uba don ïa ka jingkhia kaba 974 gramme na ka jingkhmih bniah na une u briew ïa uba la tip kyrteng kum u Sirukuddin Laskar (24).

Ka dor ïew ban die ïa une u drok ka long T. 3 klur,” la ong u Numal Mahatta, uba long u Superintendent of Police jong ka Cachar distrik. Shuh shuh la ïathuh ba ha ka taïew ba la lah, ki pulit ka Assam ki la ïoh ban kurup ïa kiba bun ki tiar siat kynthup ïa ki kuli ïasiat ha Udalguri distrik kaba don ha ka jylla.

Ki pulit ki la kem ïa arngut ki briew kiba la donkti ha kane ka jingïoh kurup ïa kine ki tiar siat.