Shillong, Jylliew 24
Ka ‘thei ïalehkai Mixed Martial Arts na ka Jylla ka samla Damerbha Rumnong ka la khur ïa ka takma ksiar ha ka lympung ïalehkai ba la tip kum ka AJP Abu Dhabi Jiujitsu Pro Championship kaba la long ha Indira Gandhi National Stadium kaba ha nongbah Delhi.
Kane ka nam jop ka la wan hadien ba ka Damerbha na ka Hynñiewtrep MMA and Fitness Club Lummawbah ka la lah ban pynliem noh ïa ka ‘thei ïalehkai ka liang pyrshah ka Fiona Mayben kaba na na Westbay BJJ Mumbai ha ka jingïakun final kaba la long ha ka 22 tarik mynta u bnai.
Katba uwei pat u rangïalehkai ka Jylla u Enboklang Mawnai na ka Hynñiewtrep MMA and Fitness Club Lummawbah, u la khur ïa ka takma rnong hadien ba u la lah ban pynliem noh ïa u Ravinder Chand uba na ka Crosstrain Fight Club Delhi, katba u Bakhamkyrpang Manik Syiemlieh na ka Hynñiewtrep MMA and fitness Club u la shah rem noh ha ka jingïakhun quarter finals.
Baroh lai ngut kitei ki rangïalehkai ka Jylla ki la ïoh ban bat ïa la ki jong ki kyrdan hapoh ka ri India, kumjuh ha ka dewbah Asia bad ka pyrthei. Ka Damerbha ka la ioh ban bat ïa ka kyrdan ba nyngkong hapoh ri India, ba phra ha Asia bad ba 50 ha ka pyrthei. U Enboklang u la wan ba 16 hapoh ri India, ba 89 ha Asia bad ba 596 ha ka pyrthei. U Bakhamkyrpang u la bat ïa ka kyrdan ba 31 hapoh ri India bad ba 175 ha Asia.
