Nongstoiñ, Jylliew 24
Ka kynhun ïalehkai jong ka Sib Singh Memorial Govt. HSS ha ka Under-17 ki shynrang, ka Kyrshai Govt. LP&UPS ha ka Under-17 ki kynthei lem bad ka Dapboklang Giri Memorial SS ha ka Under -15 ki shynrang ki la rah ïa ka nam lahduh ha ka West Khasi Hills District Level Inter School Subroto Mukherje Cup Football Tournament 2024 ba la pynlong da ka shlem treikam jong ka District Sports Officer.
Ka nam tam jong ka Sib Singh Memorial ka la wan hadien ba ka la lah ban pynliem noh ïa ka Dapboklang Giri Memorial SS lyngba ka tie-breaker da 3-2 kol hadien ba ki la ïakhaid khlem da don ba thep kol ha ka jingïakhun final kaba la long ha ka Lah Sngi U Blei ha madan New Nongstoiñ.
Shuh shuh ka nam tam jong ka Kyrshai Govt. LP& UP ka la wan hadien ba ka la lah ban pynliem noh ïa ka Sib Singh Memorial Govt. lyngba ka tie-breaker da 3-2 kol hadien ka jingïakhaid da mar shi kol.
Nangta, ka nam jop jong ka Dapboklang Giri Memorial SS kala wan ba ka la lah ban pynliem noh ïa ka St.Anthony’s SS da 2-1 kol.
Ïa ka nam Best Player ha ki Under-17 la khur da ka Esha Nongum na ka Kyrshai Govt. LP& UP bad u Firstly John Ïawren na ka Donbosco SS, Mawkhlam, katba ha ka Under-15 shynrang pat la khur da u Ïohborlang Lyngkhoi na ka Dapboklang Giri Memorial SS.
Ha katei ka sngi ka Ela Begum Laskar, DSEO ka West Khasi Hills District ka la long ka kongsan ha ka jingdonlang ruh ka Kong Balarina Syiem (DSO), ki nongkitkam ka NDSA, Ki nongkitkam jong ka New Nongstoiñ Sports Social & Cultural Club, u Syiem ka Hima Nongstoiñ u Pa’im E.P.Syiem, ki nonghikai , ki riew rangbah kiba la sam ruh ia ki khusnam bad kiwei kiwei de.
Te kumta ka Sib Singh, Kyrshai bad ka Dapboklang Giri Memorial kin mihkhmat ia katei ka district sha ka State Level Inter School Subroto Mukherje Cup Football Tournament 2024 ka ban sa long shen ha ka nongbah Shillong.
