Shillong, Jylliew 24
U Chief Executive Officer (CEO) jong ka Shillong Municipal Board (SMB) u Prafulla Kr. Boro, MCS u la ujor da ka ejahar pyrshah ïa uwei u briew uba la leit ban lum pisa beaiñ ha ka kyrteng ka SMB na kiba shong die madan ha nongbah Shillong.
Ha ka kyrwoh khubor ba la pynmih paidbah mynta ka sngi ka 24 tarik Jylliew 2024, u CEO u la pyntip ba ka shlem treikam jong u, ka la ïoh ïa ka khubor halor ka jingdon jong uwei u briew uba la lum pisa beaiñ ha ka kyrteng jong ka Shillong Municipal Board bad uba don ïa ki receipt thok ïa kiba la shon ha ka kyrteng jong ka shlem treikam.
La ong ruh ba une u briew u la lum pisa beaiñ na ki briew kiba shong die madan da kaba kam ba kiba shong die madan kin hap ban pynrung kyrteng ïa kaba ka Town Vending Committee (TVC) lyngba ka shlem treikam jong ka Municipal ka la leh ïa ka jurip katkum ka Meghalaya Street Vending (Protection of Livelihood and Regulation of Street Vending) Scheme, 2023.
Na ka liang u CEO u la pyntip ba kumba ka long mynta kam ju don kaba kum kata ka jinglum pisa ne shim ïa ka bai pynrung kyrteng da ka TVC. U CEO u la pyntip ruh ba ka shlem treikam ka la ïohpdiang ïa ka dur jong une uba lum pisa beaiñ ha ryngkat ki slip thok kiba la siew kiba ïoh lyngba ka Whatsapp Group.
Halor kane, ka Shillong Municipal Board ha ka Lah Sngi U Blei, ka la aiti ïa ka dur jong une u nonglum pisa beaiñ, ïa ka receipt ba la shna thok sha ki pulit bad ha kaba la kyntu ïa ki pulit ba kin kem bad ai jingpynsaja ïa une u briew katkum ki kyndon jong ka aiñ.
