Aizawl, Jylliew:
U Myntri ka DM&R u K. Sapdanga u la pynlong da ka jingïalang bad ka Inter-Ministerial Team kaba mihkhmat na ka liang ka sorkar kmie bad ki nongmihkhmat jong ka sorkar jylla na ka bynta ban ïakren halor ki jingshah ktah na ka jingkhie jong ka ‘erïong Remal ha ka jylla baroh kawei, ha kaba la ong ba ka la donkam na ka bynta ka jylla kumba la antad da T. 237.6 klur ban ïoh ban leh ïa ki kam ha kaba ïadei bad ki jingpynbha bad ki jingmaramot bad kumjuh ban ai jingkyrshan ïa ki lanot.
U Chief Secretary Dr. Renu Sharma ha ka jingïalang ba la dep ban pynlolng, u la pdiang burom ïa ki heh sorkar bad pynpaw ka jingsngewnguh na ka bynta kane ka jingpyllait por jong ki.
U Myntri ka tnat ki kam pohïing u K. Sapdanga, uba bat ruh ïa ka kam kum u Myntri jong ka DM&R, u la batai shai ïa ka kynhun halor ki jingwan pynjulor jong ka ‘erïong Remal ïa ki surok kiba don ha kylleng ka jylla, ka rukom sam um, ka jingpynpoi bording bad kiwei pat ki jingdonkam jong ki paidbah kumjuh ki Project kiba dang don hapdeng ka jingpyntreikam.
U la pynpaw ka jingduh jingkyrmen ha kaba ïadei bad kine ki jingshah pynjulor bad u la pynpaw ka jingsngewnguh ïa ka kynhun kaba la wan na ka liang ka sorkar kmie kaba la don ka mon ban ai jingïarap.
U Myntri ka tnat ki kam pohïing u la pyntip sha ki heh sorkar ba u Myntri Rangbah ka jylla u Lalduhoma u la phah ïa ka dorkhas sha u Myntri ka tnat ki kam pohïing jong ka sorkar kmie u Amit Shah ha kine ki sngi ba la leit.
Ka jingwan thombor jong ki bor ka mariang ka la shim ïa ka jingim jong 34 ngut ki briew bad wanrah ïa kiba bun ki jingdon jingem jong ki riew paidbah bad jong ka sorkar.
Ïa ka Inter-Ministerial Team, la khlieh da u Abhijit Sinha, Joint Secretary jong ka Ministry of Home Affairs, kynthup u Jinta Das, Director jong ka Department of Agriculture, Cooperation & Farmer’s Welfare, Directorate jong ka Jute Development, Kolkata; Mahesh Kumar, Deputy Director jong ka Ministry of Finance, Department of Expenditure (FCD), New Delhi; Rajveer Singh, Superintending Engineer jong ka Ministry of Jal Shakti, CWC, Silchar; Adelbert Susngi, Regional Officer jong ka Ministry of Road Transport and Highways, Guwahati; bad u Moti Ram, Assistant Commissioner (NSAP), Rural Development, New Delhi. Ka Chief Secretary Dr. Renu Sharma ka la pynïaid ïa ka jingïalang, ha kaba ki nongmihkhmat na DM&R, PWD, PHED, P&ED, Agriculture, bad Horticulture Departments ki la pyni ïa ka PowerPoint Presentations.
