Shillong, Jylliew 25
U MP ka Voice of the People Party (VPP), u Dr Ricky Andrew J Syngkon, un ym thep ‘vote’ ha ka ilekshon ban jied ïa u Speaker lane Lamphang ka Ïingdorbar Thawaiñ Lok Sabha ka ban long ha ka Sngi Balang.
Ïa kane, la pyntip da u President ka VPP, u Bah Ardent Miller Basaïawmoit ha ka miet Sngi Ba Ar.
Mynta ka sngi u Dr Ricky u la bam smai kum u MP Lok Sabha hadien ba u la jop ïa ka ilekshon.
Hadien ka ilekshon, ka VPP ka la pynbna ba kan ym kyrshan ïa ka kynhun National Demo-cratic Alliance (NDA) ba la ïalam da ka BJP bad kaba ïalam ruh ïa ka sorkar lane ïa ka INDIA Bloc kaba don ha ka liang pyrshah.
Mynta ka sngi, ka BJP ka la pynbna ba u Speaker/Lamphang jong ka Dorbar Lok Sabha ba 17, u Om Birla, uba dei u MP na Kota, Rajasthan, un long u kyrtong ka NDA ha ka ilekshon jied Speaker.
Na ka liang ka seng Congress ka la sei da u K Suresh uba la long MP na Kerala la phra sien.
Kane ka dei ruh ka sien banyngkong ba kan don da ilekshon ban jied ïa u Speaker ka Lok Sabha. Barabor ïa u Speaker la ju ïa mynjur lang da ka liang synshar bad liang pyrshah bad ym ju don ka jingthep vote.
Haba kylli la u Dr Ricky un kyrshan ïa u kyrtong ka NDA ne Congress ha katei ka ilekshon jied Speaker, u Bah Ardent u la ong ba u MP na Shillong un ym kyrshan ïano-ïano.
U la ong ruh ba ka seng ka la don ka jingangnud ba ka NDA bad INDIA Bloc kin poi sha ka jingïasngewthuh jingmut bad ban pynmih ïa kawei ka rai halor katei ka mat kaba ïadei bad u Speaker. Hynrei namar ba ka khlem long kumta, u la ong ba u Dr Ricky un ym thep ‘vote’ ha kane ka ilekshon jied ‘Speaker’.
