Mawkyrwat, Jylliew 25
Ka South West Khasi Hills District Athletics Association (SWKHDAA ) ha ka sngi Ba-ar ka la pynlong ïa ka pynkup burom ïa ki nongmareh thong kiba la wanrah nam bad burom ïa ka dong ka thaiñ bad ka jylla baroh kawei.
Kiba la la shah pynkup burom ha kane ka sngi ki long ka Kong Marqueenless Ramsiej kaba la khur ïa ka takma ksiar ha ka Meghalaya Game, ka Kong Ibansara War Tde kaba la khur ïa ka takma ksiar ha Inter District School Meet 2024, ka Samla Lyntijingkyrmen K.Jahrin kaba la khur ïa ka takma ksiar ha ka Meghalaya Games, ka samla Bandasharai Marweiñ kaba la khur ïa ka rakma rupa ha ka North East Games, Bah Swonding Mawlong uba la khur ïa ka takma ksiar ha ka 25k Kolkata, Bah Tlanding Wahlang Lonawala uba la khur ïa ka takma ksiar ha ka Ultra Marathon kaba la long ha Pune.
Ha kane ka sngi ka synjuk ka la ai ruh ka kitbok-kitrwiang bad pynkup burom ïa i Meiïeit ba la tymmen tam na ka thaiñ i Kong Kmoiñ Wahlang i ba long la nongmareh thong ba pawnam ka Jylla i ban sa mihkhmat ïa ka Ri India sha ka 13th Pan Pacific Master Games 2024 ka ban long ha Gold Coast Queensland kaba ha Australia.
Lah ban kdew ba i Kong Kmoiñ i la shah jied ban leit shim bynta sha Australia dei lyngba ka jingshah jied na ka Indian Women’s Athletics Team ha ka rta kaba 75 snem shaneng kaba long ha Hyderabad.
Ïa kane ka jingïalang pynkup burom ha katei ka sngi la pynlong ha Dorbar Hall Sakwang kaba ha South West Khasi Hills District ha kaba u Damang Syngkon, District Sports Officer ka SWKHD u la long u kongsan ha ryng-kat ka jingïadonlang u khlur nongmareh barim ka Jylla u Bah Bining Lyngkhoi, President ka South West Khasi Hills District Athletics Association, Bah Shiningstar Kharjahrin Myntri shnong Sakwang bad kiwei kiwei kiba la shah khot sngewbha.
