Shillong, Jylliew 26
Ka Indian Drug Users’ Forum (IDUF) ha ka Sngi Balang ka la ong ba ka jingdon jong ki briew kiba im bad u khñiang HIV hapdeng kito kiba pyndonkam drok da kaba injek ha Meghalaya ka kham jur ban ïa kito kiba ha ka ri.
U President ka IDUF, u K.P. Ezung haba ai jingkren ha ka jingïalang rakhe ïa ka ‘International Day Against Drug Abuse and Illicit Trafficking’ u la ong ba ka kaiphod halor ka ‘Magnitude of Substance Use in India-2019’ ba la pynmih da ka MSJE ka kdew ba ki don kumba 8,54,326 ngut ki briew kiba pyndonkam drok da kaba injek ha India bad na kine, 1,49,866 ngut, kata 18%, ki dei na ka Thaiñ Shatei Lam Mihngi jong ka ri.
Ïa kane ka prokram la pynlong da ka tnad Social Welfare hapoh ka Drug Reduction Elimination & Action Mission (DREAM) ha ryngkat ka jingïasnohktilang bad ka Indian Drug Users’ Forum bad Meghalaya Users’ Forum.
“Ha Meghalaya ki don kumba 11,420 ngut ki briew kiba pyndonkam drok da kaba injek. Ka jingdon jong ki briew kiba im bad u khñiang HIV hapdeng kito kiba pyndonkam drok da kaba injek ha India ka long 9.03%. Ha Meghalaya, ka jingdon jong ki briew kiba im bad u khñiang HIV hapdeng kito kiba pyndonkam drok da kaba injek ka long 11.48% – kaba kham halor haba nujor bad ka ri baroh kawei,” la ong u Ezung.
U la ong ruh ba ka Meghalaya ka dei ka Jylla kaba ar haba phai sha ka jingdon jong ki briew kiba im bad u khñiang HIV hapoh ka Thaiñ Shatei Lam Mihngi hapdeng kiba pyndonkam drok da kaba injek hadien jong ka Mizoram (Source NACO Sankalak Fifth Edition Report).
Utei u nongïalam ka IDUF u la ong ba katkum ka jingshem jong ki kum kiba pyndonkam drok bad ki sabut ba la pynmih da ki kynhun bapher-bapher (government/non- governmental), la sngewthuh ba lada shim ïa ki lynti ba pyrkhing ban tehlakam ïa ka jingkynrei u drok haba phai sha ka koit ka khiah bad ka hok longbriew-manbriew, ka don ka jingktah haba ïadei bad ka jingkoit jingkhiah bad ka bha ka miat jong ka imlang-shalang, ha kawei ka liang ka ban ïalam sha ka jingkiew ha ka HIV, ‘Viral Hepatitis’, ‘Overdose’, bad kiwei-kiwei ki jingma kiba mih na u drok.
“Ka khyrdep noh ïa ka jingkhang na bynta kito kiba pyndonkam drok bad ki bahaïing bahasem jong ki ban kner ne pan jingïarap ban ïoh pdiang ïa ki lad jingsumar bad kiwei-kiwei,” u la ong.
Ka IDUF ka la ong ruh ba donkam ban thaw ïa ki mat treikam ‘Primary Drug Prevention’, la ka long ha kyrdan jong ka ri ne Jylla ban pynkupbor ïa ki samla khnang ba kin ïoh ka jingtip bad ba ki lah ban ong “Em ïa u Drok” da kaba long pat ki mynnong jong ka jingkylla ha ka imlang-sahlang jong ki, kumjuh ban kyrshan na bynta ki sienjam ban khang lad ïa u drok, ha kajuh ka por ban pynsawa ïa ka sur jong ki ha kane ka bynta.
Na ka liang u Ezung u la ong ruh ba ka long kaba donkam ban pynlut kham bun ha ka jingwad bniah, ban sngewthuh kham bha ïa ki rukom long bapher-bapher kaba ki khynnah samla ki mad khnang ba lah ban wanrah ïa ka saiñdur na bynta ki jingdonkam jong ki.
“Dei ban leh eiei noh kloi na bynta kito ki briew kiba dang shu sdang pyndonkam drok, khnang ban khang lad ïa ki ba kin shaniah tylli-tyllan ha u drok bad ban pynduna ruh ïa ki jingma ba ïadei bad ka jingpyndonkam drok,” la ong u President ka IDUF.
Shuh shuh u la bynrap na ka bynta kito kiba la shaniah tylli-tyllan ha u drok, kaba donkam ka long ban sumar ïa ki da kaba peit na ka liang ka koit ka khiah, naba la ithuh ïa ka jingkyrni ha ka jingdih drok kum ka jingpang da ka American Medical Association bad ka World Health Organisation.
