Bengaluru, Jylliew:
U Symbud Myntri Rangbah jong ka Karnataka u DK Shivakumar ha ka sngi Ba-ar u la ai jingkyrshan ha kaba ïadei bad ka jingpynkiewdor ïa ka dud bad u la ong ba kane ka dei na ka jingdawa jong ki nong-ri masi khem dud jong ka jylla.
“Ka dor jong ki jingbam masi ka la kiew. Kiba bun na ki kynhun ba ju pynmih ïa ka dud ki la dawa ba la dei ban pynkiew dor noh ïa ka. Ki nongri masi khem dud ki ju ïoh duna bha ka pisa na ka bynta ka dud. Ha kaba ïadei bad kane, ka sorkar ka la kular ban pynkiew ïa ka dor jong ka dud,” la ong u Shivakumar, uba long ruh u heh nongïalam jong ka seng Congress ha ka jylla.
Hashwa kane, u Shivakumar u la kynthoh jur halor ka jingkren jong u Myntri ka sorkar kmie u HD Kumaraswamy ha kaba la ong ba ki nongsynshar ba hashwa kim shym leh ei ei na ka bynta ka Channapatna.
Ha ka jingai jingkren sha ki nongthoh khubor ha Mangalore International Airport hashwa ban leit sha Kukke Shri Subrahmanya Swamy Temple, u Shivakumar u la ong, “Nga la rung ha ka kam saiñ pyrthei hashwa u Kumaraswamy. Nga la tip shaphang ka Channapatna da kumba 10 snem kham palat ban ïa u. Nga dei uba na Channapatna. Kumno u tip ba ngam shym la leh ei ei na ka bynta ka Channapatna? Nga la ïakhih pyrshah ïa u kpa jong u (u HD Deve Gowda) ha u snem 1985. U Kumaraswamy u la rung ha ka kam saiñ pyrthei ha u snem 1995. Kum u Myntri ha ki por ba laleit, nga la trei na ka bynta ki briew jong ka Channapatna. Mynta ka la dei ka por ba ngan trei na ka bynta jong ki. U para jong nga u Suresh um don mon ban ïakhun ha ka ilekshon shiteng samoi na Channapatna. Naba ki la don kumba 85,000 ngut ki briew kiba la ai jingkyrshan na ka bynta jong ngi ngim lah ban ieh ïa ki mynta. Ki briew ki la ai ka jingkyrkhu da 136 tylli ki konstitwensi ha Assembly…. ngi donkam ban trei na ka bynta ka roi ka par jong ki.”
