Nongpoh, Jylliew 26
Ka tnat Excise ka la lap ïa kawei ka karkhana kaba la khang khyrdep naduh u snem 2018, bad mynta la pyndonkam biang ïa ka kum kawei na ki jaka ban shet bad pynmih ïa ka kyiad phareng khlem da ïoh jingbit ne laisen hynrei kaba la shu treikam beaiñ.
Kane ka jinglap jong ka tnat Excise ka Ri Bhoi District ka la long hadien ka jingïoh ïa ka jingtip kaba thikna halor ka jingdon jong ka karkhana shna kyiad beaiñ ha Byrnihat, bad kumta ha ka janmiet jong ka Sngi Ba-ar ki pulit ka tnat hapoh ka jingïalam jong u Superintendent of Excise ka Ri-Bhoi u Bah RC Lyngdoh, ki la hiar ban pynlong ka jingkhynra ban lapdien ïa katei ka kam beaiñ.
Ha katei ka jingkhynra jong ka tnat Excise ka Ri Bhoi, la ïarap lang ruh da ka tnat Excise jong ka jylla Assam, ha kaba ki la lap ïa kawei ka karkhana ha shnong Rajabagan, Byrnihat kaba ju pynmih ïa u shana Cashew Nuts ha shwa jong u snem 2018, hynrei la pynlong pat ïa ka mynta kum ka jaka shna beaiñ ïa ki kyiad phareng khlem ka jingïoh jingbit lane ka jingtip jongno-jongno.
U Rangbah Shnong ka Rajabagan, u Bah Anand Timung, u la ïathuh na ka liang ka jong u, um don jingtip satia halor ka jingdon kaba kum katei ka karkhana shna kyiad beaiñ hapoh ka shnong, da kaba ïathuh ruh ba katei ka karkhana la khang khyrdep naduh u snem 2018 bad ka la shu long tang kum ka kudam buh tiar bad na ka liang ka shnong ruh, kim poi pyrkhat satia ba kan dang treikam. U la pyntip ruh ba wat ïa ka jingai jingbit (NOC) ïa katei ka karkhana kam don shuh bad ïathuh ruh ba ki briew kiba ju rung ju mih um ithuh satia naba ki dei kiba la wan ïalam na kiwei ki jylla. Katba u Superintendent of Excise ka Ri Bhoi Bah RC Lyngdoh u la ïathuh ba ka tnat ka la ïoh jingtip halor ka jingdon jong ki karkhana shna kyiad beaiñ, khlem laisen bad khlem register, kiba wanrah ïa ka jingduh khajna ba shyrkhei ïa ka sorkar, kumta la pynlong ïa ka jingleit khynra ban lap dien ïa kitei ki kam beaiñ ryngkat ka jingïarap ka tnat Excise jong ka jylla Assam.
Ha katei ka jingkhynra kaba sdang naduh ka por 3 baje janmiet, ka kynhun jong ka tnat Excise ka la ishan khmat ïa kawei ka karkhana bad ka jingkhynra, la lap ïa kitei ki kam beaiñ hapoh katei ka kharkana kaba don ha ka shnong Rajabagan bad pyntip ruh ba ka kyaid kaba la shna beaiñ ha kane ka jaka, ka dei kaba thmu ban shalan tang ha Meghalaya bad ha jylla Assam.
Ha kane ka jingkhynra, la ïoh ruh ban kem noh ïa 14 ngut ki briew ba kynthup 12 ngut ki nongtrei bad 2 ngut ki peit ïa ka jingïaid ka kam, ha kaba u Bah RC Lyngdoh u la ïathuh ba yn pynngat ïa kitei, katkum ki kyndon aiñ jong ka Excise bad la kurup noh ïa baroh ka kyiad kaba la lap na katei ka jaka. U la pyntip ruh ba ka tnat Excise hi kan dang ïai peitngor ban pynduh jaid ïa kum kine ki kam beaiñ.
