Raphael Warjri
Ki mawbynna ki don arjait, ki mawbynna niam bad mawbynna nam ki ba ym dei ki mawniam, hynrei wat ki mawnam ruh donkam ban da ïapan da ka ktien da u nongswar. Kane ka rukom ïapan ka dei ka ktien bad ka stadtip stadmaïan ki longshwa manshwa kaba dei ryngkat bad ka jingtbit jong u nongswar bad ka buit jingstad ban it ksai ïa u maw ban phiah bad ban thang shun kum ha pajwa. Ka tynrai ka long ba u nongswar u leit marwei ne bad la ki synran ban wad ïa u mawramsong uba la mon ban khet ban thlieh na ka bynta ban shna mawbynna. Hadien ba u tymmen nongswar u la dep ka ktien, u hukum ïa u kamar ban wad ksai na kano ka jaka ba bit ban thlieh bad u sei ka dabia na ïarong ban thohshun ha u mawramsong. Nangta ïa ki synran u dang phah thoh dieng thynram, katba u dang thew bad buh dak ryngkat bad u kamar ban kham biang ka kam katkum ka jingtbit. Ka rukom thoh shun ruh ka long katkum ka dur ka dar bad jingheh ba donkam ban thung bad ynda la dep thohshun, u sa hukum ïa ki synran ba kin tei dieng thynram ban taplup ïa ka jaka ba la thoh shun bad buh dak u kamar. Nangta u tymmen nongswar u sa duwai phirat ban kyrpad ïa ka syiem ding ban tbeh hangta haba la tei dieng thynram. Ynda la ïeng ka ding u tymmen nongswar u da kren ïa ka syiem ding ba kan ym pur sha sawdong sawkun jong ka jaka khlaw ba don u mawramsong khnang ban lait na ka pluh. Katkum ba bthah u tymmen nongswar, ki synran ki lah ban pynkhreh hadien shisngi ne arsngi laisngi ban leit shaw mawbynna.
Ha ka sngi leit shaw mawbynna dei ban da leit lang bad ka ksing ka dhah, ka phawar ka risa naduh khyrdop shnong. Ha lynti ban leit shaw mawbynna, la ialam da u tymmen nongswar da kaba kyriah artat ki phawar kiba dei katkum ka bynta ban teinam. Lada dei ka sngi lyngkhuh ainam ia kino kino ki briew bakhraw ha ka imlang sahlang, ka phawar ruh kan long katkum kata ka kam bakhraw ba la noh synñiang ha shnong ha thaw da kita ki riewkhraw. Ha lynti kat ba dang phawar artat, u tymmen nongswar u ju kheit da ki tnat dieng barit ban kaweh kum u symphiah ban biang tara bad ka sur phawar. Ynda la poi ha khmat u mawramsong lada dei ha madiah baiar ne hapdeng khlaw, u tymmen nongswar u da kren shwa ia ka syiem ding lada ka dang rhem ne ka lah kylla dpei. Lada ka dang rhem dei ban da kylli pyrthew ba la biang ne em ban khlong ïa u mawlyngkniap. Lada ym pat biang dei ban ap ka hukum na u tymmen nongswar ban ai ka juban katkum ka nia bad ka syiem ding. Ynda la biang nadong shadong, u tymmen nongswar u duwai phirat ha ryngkat ka suit ka shor ban sdang khyllie noh ïa ki lyngkniap maw, uwei hadien uwei. Ka dak ksai ba buh u kamar ka dei ban don ka jingkheiñ jingdiah kaba biang ba u tymmen nongswar u tip nangno ban thohshun. Kumta u maw lyngkniap ruh u pait beit sbiak thik na kata ka dak ba la buh ksai u kamar bad thohshun u tymmen nongswar. Kane ka jingstad bad jingtbit jong ki nongswar bad jong u kamar ka la kham ñiar ban shem ha ka juk mynta, ba ha ka jingshisha ym don shuh, namar ba ki ba thung mawbynna mynta ki thlieh da ki snar.
Kane ka jingstad jong ki longshwa manshwa ka long kaba dei katkum ka stadtip stadmaian ka juk mynta ba kumno ka ksai maw na u kamar ka biang jingkheiñ bad ka thoh shun jong u nongswar ka ba treikam katkum ka jingkhluit jong ka ding ka ba thang pajwa da ki dieng thynram. Ha kane ka juk mynta kane ka riti ka la kut, ba wat ia u mawniam ruh la shu thlieh da u snar, khlem tip ïa u ksai maw. Katba dang khyllie ïa ki lyngkniap maw, u tymmen nongswar u bthah ïa ki synran ban leit thoh dieng ban shna diengbyllan ryngkat bad kaba thoh jyrmi na khlaw ha ka ba barabor ki ju kiar na u jynriew wat lada u dei uba khlaiñ ban khum ban teh ïa ki maw. Ka ba iathuh khana pateng ba tan mawbynna da u jyntang pathaw ka lah ban dei tang ka ktien ramia ne ka khana puriskam ban batai pharshi ïa ka bor maia ki radbah ne ramhah mynnor. Katkum ba ïathuh pateng te dei da ki kynja jyrmi jyrteh ba khum ïa ki mawbynna haba tan shano shano ka jaka ban thung. Ynda la biang ki diengbyllan, sa phah khyllem ïa ki lyng-kniap maw halor shwa ban tan. Ki diengbyllan ki dei ban long lai, san ne hynñiew tylli katkum ba dawa ka jingheh ki mawlyngkniap. Ha ba la pynshong ïa ki lyngkniap maw halor diengbyllan, ki sa teh sa khum da ki jyrmi ryngkat u star ba thaiñ hi da u jyrmi ban patan ki briew. Nakhmat la pynkhreh shwa da u mawkñi, bud sa ka mawkynthei bad khatduh ki mawpyrsa lada dei ar ne saw ne hynriew tylli katba biang jur.
Ynda la biang nadong shadong, u tymmen nongswar u nguh blei ïa ki ryng-kew basa ki ba sumar ïa ka meimariang ka meiramew bad u kiew artat joit halor u mawkñi. Lada don ki rangbah ba la kham tymmen u nongswar u ju kyntu ïa ki ba kin kiew halor ka mawkynthei bad ki mawpyrsa bad sdang na lade da ka ba kynkiw laisien ‘Hui… hah…’ bud ryngkhi artat ka phawar na kita ki riew tymmen katba ki paidbah ki risa ha man la ka khep ba kut ka dkhot phawar, ryngkat kaba tan bad kyllieng diengbyllan.
