Shillong, Jylliew 26
Ka Hynñiewtrep Border Disputed Redressal Forum (HBDRF) kaba dei ka kynhun na ki thaiñ khappud jong ka shnong Khanduli kaba hap hapoh ka Block-1, ha ka Sngi Balang ka la leit ban ai da ka jingthoh ha ka kamra treikam jong u Myntri Rangbah ka jylla, u Conrad K. Sangma, u Symbud Myntri Rangbah ka jylla, u Sniawbhalang Dhar bad u Chief Secretary ka jylla, u Bah Donald P. Wahlang ban pyrshah ïa ka jingdawa jong ki paid Karbi hapoh ka jingïalam jong ka Socheng Amreng Border Development Community ban pynïeng biang ïa ka khyrdop khrong khajna hapoh u pud u sam ka shnong Khanduli kaba la pynsangeh bad pynduh pyndam noh da ka sorkar Assam bad ka sorkar Meghalaya.
Haba kren sha ki lad pathai khubor, u Chairman jong ka HBDRF, u Bah Chandame Sungoh u la ong ba na ka liang ka HBDRF ka dawa ïa ka sorkar ba ka dei ban leh eiei halor kane ka jingdawa jong ka kynhun ki paid Karbi namar ba kane ka jingdawa ka long ban wanrah biang ïa ka jingïakynad hapdeng kine ki artylli ki jaitbynriew kiba don ha katei ka thaiñ da kaba dawa ban wanrah biang ïa katei ka khyrdop lum khajna kaba la pynïeng beaiñ hapoh ka shnong Khanduli.
“Na ka liang jong ngi ka Forum, ngi ai ïa kane ka jingthoh ban kyrpad ïa ka sorkar ba ka dei ban leh eiei halor kane ka jingdawa jong kane ka Socheng Amreng Border Development Community namar ba ka long kum ka jingkynroi biang jong ki ban wanrah ïa kata ka kynrum-kynram lane kata ka jingïakynad hapdeng kine ki ar Jaitbynriew kiba don ha katei ka thaiñ”, la ong u Bah Sungoh.
U Bah Sungoh u la ong ruh ba katei ka kynhun jong ki paid Karbi ka la ong ba baroh ki paid Khasi bad Pnar khamtam ki paidbah nongshong shnong ka Khanduli kiba don ïa ki bri bad ki lyngkha shapoh ka shnong Karbi ki dei ban pynrung kyrteng ïa ki lyngkha jong ki shapoh ka Karbi Anglong Autonomous Council bad u Bah Sungoh u la ong ba kane ka la ktah haduh katta-katta ïa ki nongshong shnong jong ka Khanduli.
“Kumno ki pynbor ïa ki paid nongshong shnong ka Khanduli ban rejistar ïa ki lyngkha jong ki tang namar ba ki lyngkha jong ki, ki don hapoh kine ki shnong Karbi? Kine ki shnong Karbi wat lada ki dei ki shnong Karbi hynrei ki hap hapoh u pud u sam jong ka jylla Meghalaya bad ki la shim kabu namar ki nongshong shnong hangto ki dei ki Karbi”, la ong u Bah Sungoh.
Shuh-shuh u Bah Sungoh ha katei ka sngi lyngba ka jingthoh ba u la ai sha ka sorkar u la pynkynmaw ruh ïa ka sorkar halor ka jingshah pynïap dusmon u paradoh-parasnam ïa uba la tip kyrteng kum u Bah Tellme Talang ha ka 29 tarik u Jymmang 2024 ha ka shnong Lapangap ha kaba la kynnoh ba ka jingshah pynïap jong utei u briew ka dei kaba la leh da kiwei pat ki Jaitbynriew.
Na ka liang u Bah Thomas Passah uba dei u nongaiktien jong ka HBDRF, u la ong ba kane ka jingshah ïuhroit ki paid Khasi bad Pnar kiba don ha ka shnong Khanduli kaba hap ha ki bynta khappud ka dei namar ka jingkheiñ sting eh na ka liang jong ka sorkar.
U la ong ba kum ka sorkar bad kiwei-kiwei ki seng saiñ pyrthei ki dei ban shimkhia lem ïa kane ka jingeh kiba kum ki paradoh parasnam ki ju mad na ka sha ka por ha ki thaiñ khappud.
“Ym ïoh ïakynduh wat la buh shithi bunsien”
Hap ithuh ïa ki briew ba ïajan bad u CM, lada kwah ïakynduh ïa u: Thomas, U Nongaiktien ka Hynñiewtrep Border Dispute Redressal Forum (HBDRF), Bah Thomas Passah, u la pynpaw ka jingbitar halor ka jingbym ïoh ban ïakynduh ïa u Myntri Rangbah ka jylla u Conrad K Sangma, wat hadien ba la dep ban buh shithi kwah ïakynduh da kiba bunsien.
U Bah Thomas Passah ryngkat bad u Chairman ka HBDRF u Bah C Sungoh ha ka Sngi Balang ki la leit biang sha Secretariat da ka jingthmu ban ïakynduh ïa u Myntri Rangbah na ka bynta ban pynsngew ha u ïa ki mat ki jura bad ki jingeh jong ki nongshong shnong ha thaiñ khappud hynrei kim shym la ïoh lad satia ban ïakynduh.
Haba kren sha ki lad pathai khubor, u Bah Thomas Passah haba pynpaw ïa ka jingsngew bynñiaw halor ka jingbym ïoh ban ïakynduh ïa u Myntri Rangbah u Conrad K Sangma wat hadien ba la dep ban buh ‘appointment’ ne shithi kwah ïakynduh la bunsien, u la ong ba kane ka paw ba lada kwah ban ïakynduh ïa u Myntri Rangbah hap ban ithuh ïa ki briew kiba ïajan bad u.
“Kaba sngewsih ka long ba wat la la phah bunsien ngi la phah ïa ki shithi ban ïoh ïakynduh ïa u Myntri Rangbah hynrei ngim ju ïoh satia ïa ka jubab la u treh ne um treh ban ïakynduh,” la ong u Bah Thomas Passah bad bynrap ba na ka liang jong ka ophis u Myntri Rangbah ka dei ban pynbeit ïa kane ka kam.
“Ka jingkwah jong ngi ban ïakynduh ïa u Myntri Rangbah ka long ban ïoh ban pynsngew hakhmat jong u, ïa ki mat ki jura jong ka jaidbynriew bad kane kam dei ka sien ba nyngkong ba ngi wan, hynrei la bunsien. Hato da ka jingbym ïoh ïakynduh ïa u Myntri Rangbah ngin sngap jar noh? Kata ka bym lah ban long,” u la ong bad bynrap ba katkum ka jinglap, ba lada kwah ïakynduh ïa u Myntri Rangbah hap ban ithuh ïa ki briew ba ïajan bad u, kane ka dei kaba bakla bha. U Bah Thomas u la ong, “Ka long kaba eh bha ha ka synshar paidbah ban long kumne. Ngi khlem wan hangne ban ïakren ïa ki kam shimet jong ngi hynrei ngi wan na ka bynta ban ïoh ban pynsngew ïa ki mat ki jura jong ka jaidbynriew khamtam ka jingeh jong kito ba shong ba sah ha khappud.”
