Shillong, Jylliew 26
U Chairman jong ka Khasi Hills Autonomous District Council (KHADC) u Bah Lamphrang Blah u la phah ka khubor jingsngewlem halor ka jingkhlad noh u Bah Teiñwell Dkhar, MDC ka Shella Constituency.
U Bah Teiñwell Dkhar u long u nongïalam ba rangbah bad jai-jai. U la jop kum MDC saw sien kynthih naduh u snem 2004 bad u la bat kum u CEM, Chairman, Nongïalam ka Liang Pyrshah bad kiwei ki kam ha KHADC.
Ka jingkhlad noh jong u, ka long ka jingduh bakhraw ïa ka Council bad ka jaidbynriew, la ong u Chairman bad phah ruh ka jingsngewlem sha ki bahaïing bahasem ba U Blei un don ryngkat ban pyntngen ha kum kane ka jingjia ba sngewsih.
Kumjuh ruh na ka liang ka ophis jong ka Executive Committee (EC) ka KHADC ka la phah ïa ka khubor sngewlem sha i kurim lem bad ki khun ki kti bad ki bahaïiing bahasem, ki lok ki jor bad baroh ki paidbah jong ka Shella Constituency.
Ha kaba ïadei bad kane ka jingjia ba sngewsih bad kum ka dak ban kynmaw burom ïa u (L) Bah Teiñwell Dkhar, ka Executive Committee ka la rai ban ai shuti shiteng sngi ha ka 28 tarik u Jylliew, 2024, ha baroh ki ophis jong ka KHADC kaba dei ka sngi leit ontep ïa ka met jong une rangbah ba la khlad noh.
