Shillong, Jylliew 26
U Bah Teiñwell Dkhar, 62 snem ka rta, u dei MDC ba la jop saw sien na ka seng UDP na Shella constituency, East Khasi Hills District, u la khlad noh na kane ka pyrthei ha ka Sngi Balang ka 26 tarik Jylliew ha ka por 6:00 baje mynstep ha ïing sah ha Mawlong kaba hap ha Shella constituency.
Haba pynthikna ïa kane, u Bah Titos Chyne uba dei u MDC ka UDP na Sohra constituency bad uba dei u nongïalam ka liang pyrshah ha ïingdorbar ka KHADC, u la ïathuh ba ïa u Bah Teiñwell yn tep donburom ha ka 28 tarik mynta u bnai ha ka shnong jong u ha Mawlong.
Halor kane ka khubor kaba sngewsih, u la pyntip ba ka UDP ka phah ïa ka khubor sngewlem sha ka ïing ka sem namar ka jingkhlad noh jong u Bah Teiñwell Dkhar.
Nalor kane, u la ïathuh ba u Bah Teiñwell u la jop haduh saw sien ïa ka ilekshon MDC na ka seng UDP na Shella constituency kata naduh u snem 2003 haduh u snem 2019.
Shuh shuh u la pyntip ba ha kine ki bnai ba la dep u Bah Teiñwell u la dep pynpaw ha ka seng UDP ba un nym ïakhun shuh ïa ka ilekshon MDC namar ba u don ha ka jingshitom ka met hynrei khlem poi pyrkhat ba mynta ka sngi u la khlad noh na kane ka pyrthei.
U la pynkynmaw ba u Bah Teiñwell u la long kum u Chief Executive Member, Chairman bad ruh kum u nongïalam ka liang pyrshah.
U la pynkynmaw biang ba u Bah Teiñwell u dei u nonghikai skul ha Mawkyrwat hynrei hadien kata ki nongïalam ka UDP ki la leit khot ïa u ban ïakhun ïa ka ilekshon MDC na Shella ha ka por ba dang long MLA u Dr. Donkupar Roy ha u snem 2003.
U Bah Titos u la ïathuh ba u Bah Teiñwell naduh ba u jop ïa ka ilekshon MDC um pat ju kylla ïa ka seng, u ïaineh beit ha ka UDP haduh ban da khlad na kane ka pyrthei.
Da kane ka jingkhlad u Bah Teiñwell ka UDP mynta ka sah sa 7 ngut ki MDC ha KHADC.
