Shillong, Jylliew 27 (UNI)
Ki briew ka Central Bureau of Investigation (CBI) bad Customs (Vigilance) ki la leit rung sha ka Land Port kaba don ha Dawki ha khappud India-Bangladesh ha ka Sngi Balang, la ïathuh ki tyllong khubor ha ka Sngi Palei.
Ka jingleit jong ka CBI bad Customs (Vigilance) sha katei ka kad khaïi ka long hadien ba la mih ki jingkynnoh ba ki don ki kam bamsap bamngem da ki heh kiba dei peit ïa katei ka kad ha Dawki.
Ka tyllong khubor na uwei u heh sorkar ka ïathuh ba ka jingkynnoh bamsap bamngem ka kynthup ïa ka jingailad ïa ki trok kiba kit palat pud ban ïaid na katei ka kad.
Shuh shuh utei u heh sorkar u la ïathuh ba ki briew ka CBI bad Customs (Vigilance) ki la peit ïa ki kot ki sla kiba don ha katei ka kad bad ki la buh jingkylli ruh ïa kito kiba pynïaid ha katei ka kad khaïi.
Hynrei, na ka liang u ‘Manager’ jong katei ka kad khaïi, u T Chacko, u la kyntait ïa ka jingkynnoh ba ki don ki kam bamsap bamngem bad ka jingwan khynra jong ka CBI bad Customs (Vigilance).
“Kam shym la dei ka jingkhynra, hynrei ka dei ka jingwan jurip kaba ju leh na ka por sha ka por da ka CBI bad Customs (Vigilance), bad ki khlem lap ïa kino-kino ki jingduna ne ki jingbym biang,” la ong u Chacko haba ïakren bad ka UNI.
Na katei ka kad khaïi ha Dawki, ka jingïaid jong ki trok ha ka shi sngi ka long hapdeng 700 haduh 800 tylli ban leit sha Bangladesh, bad kiba bun na kine ki trok ki dei kiba kit maw bad mawshun.
Katkum ki kyndon kiba treikam mynta, ki trok kiba kit palat 10 Metric Ton kin hap ban siew T. 354 katba kito kiba kit hapoh ka 10 Metric Ton ki hap ban siew T. 236.
Katei ka kad khaïi ha Dawki ka don ha West Jaiñtia Hills District kaba jngai kumba 84 km na Shillong katba ka kad khaïi kaba don ha Bangladesh ka dei ka Tamabil kaba don ha Sylhet District.
