Nongpoh, Jylliew 27
Ka Federation of Khasi Jaiñtia & Garo People (FKJGP) Sohkhwai Umdu Unit ka la pynpaw ïa ka jingsngewkhia kaba jur halor ka jingïoh ïaid laitlan jong ki trok kiba kit beaiñ ïa ki dieng, rnga bad dewïong na ka surok Sohkhwai-Umdu ter ter bad mih sha ka surokbah National Highway 6 sha 20 Mer.
La ong ba kane ka jingïoh ïaid laitlan jong kitei ki trok ka la wanrah jingeh ïa ki nongleit nongwan, namar ka la pynsniew bad pynjot rathai ïa ka surok.
Ha ka Sngi Palei ki nongïalam bad dkhot ka FKJGP haba ki la hiar jurip ki la lap ruh ïa kawei ka trok kaba kit rnga beaiñ kaba la liat sha nala namar ba katei ka surok ka dei kaba khim bad kaba la jot rathai. Kumta ki nongïalam jong ka seng ki la kynnoh ba kane ka jingïoh ïaid sahuh jong kitei ki trok kiba kit khia shaba palat pud ka la nang pynjot shuh shuh ïa ka surok kaba la jot lypa.
Kum ban shu kdew hangne, na ka liang ka FKJGP North Khasi Hills District ha kine ki khyndiat taïew ba la dep, ka la leit mih ruh sha ka shlem treikam jong u Assistant Executive Engineer jong ka PWD Roads ka Nongpoh na ka bynta ban dawa ba u kontraktor uba la dep ban pyntrei ïa katei ka surok kaba dei na skhim PMGSY, u dei ban maramot noh mardor kaba long ruh katkum ka kyndon jong katei ka skhim, kata ba u kontraktor hapoh ka san snem hadien ka jingdep ban shna, u hap ban maramot bad pynbha lada ka surok ka jot noh.
Ha kajuh ka por, ka seng ka la buh ïa ka jingkyntu sha ki pulit ba ki dei ban shimkhia ban pynshitom bad khanglad ïa ka jingïoh ïaid sahuh jong ki trok kit khia bad kiba kit beaiñ ïa ki dieng, rnga bad dewïong nangne shakhmat bad byrthen ruh ba lada kim leh eiei, na ka liang ka seng kam banse ban shim ha kti ïa ki sienjam ban khanglad ïa katei ka kam beaiñ.
