Kum ki briew hangne ha sla pyrthei ngi donkam eh ban don ka ïing bad pisa. Haba ngim don pisa bad ka ïing ban shong ban sah ngim suk ka mynsiem. Kine ar tylli ki long kiba donkam tam eh ha ka jingim kaba man ka sngi. Ka ïing lei lei ka long kaba kongsan tam ha ka jingim jongngi ki briew khamtam kiba duk. Haba ong ka ïing ka dei ka ïing la jong kaba ngi shong ngi sah bad ym dei ka ïing ki briew ne ka ïing shongwai (Rented House). Lada ngi shu shongwai ka jingmut jingpyrkhat ka ïai mih man ka sngi khamtam lada ngi duna pisa lei lei ka pynkhuslai ïa ngi ha ka jingim. Lada ngi duna kine ar ka jingim ka pynkordit bad pynkhuslai.
Dei kane ba baroh ngi da kwah eh ban ioh la ka jong ka ïing ne ka jaka ban shna ïing shongïing sah. Hooid ki don kiba don ba em (Riewspah) ki suk ka mynsiem ban shu shong wai namar ki don shibun ka spah bad ka pisa. Hynrei ha kiba duk ba rangli te ngim suk haba ngim don pisa bad ka ïing kaba ngi shong ngi sah. Katno ngi da sngewkmen haba ngi ïoh la ka jong ka ïing ka sem hangne ha pyrthei ruh. Wat lada ngim don pisa ruh ngi hun hana ngi don la ka jong ka ïing ka sem ban shong ban sah ban lait na ka lyer, u slap bad u phria. Kumta ka ïing hi ka long kum ka paradise hangne ha sla pyrthei.
C. B. Iawphniaw
