Shillong, Jylliew 27
Kham ñiar ban lap ne shem ha ri Khasi ba ka longkmie kan shim ïa ka sienjam ban ri masi khem dud tang ban ïoh pyndap ïa ka ïing ka sem wat hapdeng ka jingbunkam ban sumar ïa lai ngut ki khun kiba dangrit.
Kane ka longkmie Khasi ka dei ba la tip kyrteng kum ka Balarishisha Nongrum, 34 snem ka rta bad ka shong ka sah ha Lumsohpetbneng, Ribhoi District.
Kane ka longkmie ka la sdang ban ri masi khem dud mynta ka la ïaid palat san snem hadien ba ka khun nyngkong ka la kham heh.
Kaba sngewsih pat ka la wan jia ïa kane ka longkmie haba ka ri haduh khyndai tylli ki masi khem dud hynrei saw tylli ki la ïap noh namar ka jingwan ka khlam mynshem snem kiba shongdor palat shi lak laiphew hajar uwei katba kiwei kiba dang sah ka la die noh bad buh mynta satang ar tylli.
Ka kam ri masi ka dei shisha kaba khia namar hap ban pynbiang ka por ban aibam bad ban pynbiang ruh ka por ban khem dud hynrei ka Kong Balarishisha ka la skhem jingmut ban pynkhreh skul ïa ki khun dangstep bad pynbiang bam pat ïa ki masi por mynsngi.
Ban tip kham bniah ïa ka jingïaid lynti jong ka Kong Balarishisha, U Nongsaiñ Hima u la leit ban ïakynduh kyrpang ha ïingsah jong ka ha Lumsohpetbneng.
Ha kane ka jingïakynduh ka Kong Balarishisha ka la pynpaw ba ka la jied ïa kane ka kam ri masi khem dud ka dei namar ka sngewthuh ban leit rep. Ka shem shitom pat namar lada dei por slap hap shah wat lada dait pyrjong hynrei ka kam ri masi wat la ka teh ïa ka por pynban ka kham suk namar ka la ïoh lad ban peit lang ïa ki khun.
Ka la ïathuh ba kam pat ju leit wad kam sorkar namar ka sngewthuh ba kam don kyrdan kaba heh kumba long lem kiwei. Hynrei ka la shim ïa ka rai ban trei ïa ka kam lajong ban long kynrad namar ka la ïohi ba ka kam sorkar ka shah hukum ha kiwei pat.
Shuh shuh ka la ïathuh ba kam pat ju lap ba ki kynthei kin ri masi namar ka ban khia ïa ka bor met bad ka the palat ïa ka por namar lada jia ki jingsngewsih ha ïing kin nym lah ban pep namar ki hap ban pynbiang bam ïa ki masi.
“Don ka por ba ka sma haba ri masi hajan ïing hynrei kam lei-lei haba sma pisa” ka la ong ryngkat ka dur ba phuh samrkhie.
Kumta ka Kong Balarishisha ka la kyntu ïa ki samla wat ong ba ka jylla ka kyrduh kam namar ka kam ka pahuh lada ki trei shitom bad lada don kiba kwah ban tip ïa ka rukom ri masi ki lah ban wan khnang ba kan batai.
