Ka Lawei Ki Khun Ki Ban Dang Heh Dang San Ki Jong Ngi

Por ba dang khynnah ma ngi, ka jaka ba ngi sngewtynnad bha ban ïalehkai ka dei ha madan skul phlang jong ka sorkar shnong Wahingdoh harud ka Wahumkhrah, la ha um ne ryngkew.

Nangta pat sdang ban poi ïalehkai sa sha madan Polo, ha ka jingïalam kiba heh ki jong ngi (Seniors) kiba btin lynti ïa ngi ha baroh ki jait jingïalehkai la ha um ne ryngkew.

Ka madan Polo ka dei ka jaka ïalehkai jong baroh ki nongïalehkai, la kiba heh ne kiba rit bad ngi ïoh ban ïalehkai baroh shisngi.

Kat ka jingbha ka madan Polo 1st Ground, 2nd Ground, 3rd Ground bad ka Nehru Stadium, mynta pat ka madan Polo ka long kumno.

ïa ka Nehru Stadium ki lah tih noh ïa ka madan ba bha ka Natural ground ban siang noh da u phlang plastik. Lah dep ban shna ïa ka Artificial Turf, tang katto katne ki pynpra noh ban shna biang kum kaba rim, mynta tip shuh ka long kumno. Ba pahuh pisa te biang beit ba leh kiba don bor, katba ki nongïalehkai pat lah kut ha ki mobile phone, T.V. set bad kiwei kiwei.

Mynta pat mana ba ïoh ban ïalehkai ha madan Polo, ne ki khynnah mynta kim donkam shuh ban ïalehkai kum ha ki por jong ngi mynshwua.

Kiba ïoh ban ïalehkai mynta dei tang kito kiba lah ban wai ïa ki madan ïalehkai, ki bym don pisa  te hap shu peit kai. Na kata ka daw sa jyllei ki nongkyrni ha ka dih droks ba shyrkhei bad sa jur ka tuh ka thiem kaba buh jingma ïa ka jingim ka jong ngi bad ka imlang ka sahlang hi baroh kawei.

Haduh mynta ngim tip ei ei shaphang kaba mih na ka inquiry report ha kaba ïadei bad ka jingkhyllem ka jaka peitkai ba shna da ki siej ban shong ki nongpeitkai ha madan 3rd ground polo, ha kito ki snem ba lah dep ka long kumno.

Hato ngi hun mo ban shu sngap ba kito kiba donbor kin shu ïaleh katba mon ïa ka lawei ki khun ki ban dang heh dang san ki jong ngi.

                                                Manphyrnai Marbaniang